Abeseka uSimakade sebebona uRamaphosa njengesitha sokuqala

398

JOHN HLONGWA

BAMCHAZE njengesitha sabo sokuqala uMengameli Cyril Ramaphosa abantwana baseNdlunkulu kaZulu, abeseka uMntwana uSimakade kaZwelithini kolwesihlalo, abamsola ngokudlulisa kwakhe isinqumo seNkantolo eNkulu yasePretoria esithi wagagamela “ngokugcoba” iSilo uMisuzulu njengeNgonyama kaZulu. Abantwana bebehlangene esigodlweni sasoSuthu, KwaNongoma kuyokwethulwa umbiko weJaji uNorman Davis, othe uMengameli Ramaphosa kwakumele aqoke ikomidi elizophenya ngezinsolo zokuthi iSilo uMisuzulu kasiqokwanga ngendlela efanele, ngaphambi kokusinika isitifiketi.

UMntwana uThokozani – oyisethenjwa soMntwana uSimakade – uthe: “Sijabule kakhulu ngesinqumo senkantolo, ifakazele esasikusho ukuthi kakulandelwanga imigomo kuqokwa uMntwana uMisuzulu. 

“Isiphathe kabi indlela uMengameli Ramaphosa aziphathe ngayo kulolu daba. 

“Isenzo sakhe  sokwedlulisa icala kusenze samthatha njengesitha sethu sokuqala. Ukhuluma okunye, enze okunye.

“Umbiko wejaji ukuveze ngokusobala ukuthi wagagamela. 

“UMntwana uThembi wambhalela incwadi, emtshela ukuthi ukhathazekile ngendlela aqoke ngayo uMisuzulu, kodwa yena wayishaya indiva.” 

KUSUKELA kwesokunxale nguMntwana uMazwi waKwaMinyamazi, nguMntwana uThokozani noMntwana
uLungalomndeni waKwaMinyamanzi.

Previous articleBasonga ukumangalela isikhulu sikaMasipala weTheku ngolwe-ANCWL
Next articleUcwaningo luveza ukuthi kuzobhubhudlwa u-R215 billion kula maholide