SENZO SOKHELA
UYANYANISWA nekilabhu yakhe yakudala umdlali wamaZulu FC osefana nefenisha kule kilabhu. USuthu lusayinise uVeluyeke Zulu (29) (osesithombeni) kumasizini amabili edlule esuka kwiChippa United futhi ewumgogodla kuyona. Nokho selokhu efike oSuthwini, udonsa kanzima ukuthola isikimu. Leli phephandaba lithole ukuthi iChippa isezinhlelweni zokumlanda lo mdlali uma kuphela isizini.
Umthombo waleli phephandaba uthe: “UZulu ungomunye wabadlali abasohlwini lwalabo abafunwa yiChippa ngesizini ezayo. Naye uyakwazi ukuthi ifuna abuyele kuyona. Kodwa-ke konke kuzocaca ngokuphela kwesizini.”
Imizamo yokuthola uSiviwe “Chippa” Mpengesi ongusihlalo weChippa – okuthiwa nguyena omfuna ebuyile uZulu – iphunzile njengoba ucingo lwakhe belukhala kodwa lungabanjwa.
