NONHLAKANIPHO SHINGA
USAKHUNGATHEKILE umndeni kaNkz Simenyiwe Zondo (28) (osesithombeni), uMaDhlomo – oyinkosikazi kaMnu Sanele Zondo ongusihlalo we-IFP Youth Brigade futhi oyilungu lephalamende – emuva kokunyamalala kwakhe ngoLwesihlanu emini, wabhalela umndeni imiyalezo evalelisa.
Uyise kaNkk Zondo, uMnu Nkosinathi Dhlomo, uthi banethemba lokuthi bazomthola ephila ngoba ikhasi lakhe leFacebook kubonakala sengathi liyasebenza.
Ngokuthola kweLANGA, uNkk Zondo ubhalele uyise umyalezo ethi akagculisekanga ngomhlangano lapho ayeveza khona izinkinga abhekene nazo emshadweni, wabe esebhalela unina umyalezo evalelisa.
“Inkinga enkulu wukuthi ushiye nomakhalekhukhwini wakhe, ngakho-ke kunzima ukumlandelela, kodwa ithemba sisenalo ukuthi sizomthola ephila,” kusho yena. Umndeni ucela abangaba nolwazi bathintane namaphoyisa aseHluhluwe noma bashayele wona enombolweni ethi: 083 929 5499.
