PHUMLANI GAMA
BASAZOQHUBEKA nokubhadla esitokisini abamangalelwa ababili ecaleni lokubulawa kukaMnu Sipho “Juda” Mthethwa (osesithombeni) owayeyisishoshovu esilwa nokwebiwa kwezimoto zaseNingizimu Afrika ziweliswe umngcele owehlukanisa leli neMozambique.
UMnu Sipho Mhlanga (37) noMnu Thokozani Nxumalo (38), bebevele eNkantolo yeMantshi yaseManguzi ngoLwesihlanu, icala labo lahlehliselwa uZibandlela (December).
Bese kungokwesithupha bevela kule nkantolo. Bekulindeleke ukuba icala
liqale ukuqulwa kodwa inkantolo yaqoka ukulihlehlisa ngesizathu sokuthi kusenolunye uphenyo okusafanele lwenziwe.
Baboshwa ngesikhathi amaphoyisa enze isivimbamgwaqo eMpangeni ngoNcwaba (August).
Batholwa nezibhamu nezinhlamvu, konke okungekho emthethweni.
UMthethwa walalelwa unyendle, wadutshulwa engena emzini wakhe ngoNhlolanja (February).
