AMAZWE aseningizimu ye-Afrika angaphansi kwenhlangano iSADC asethathe isinqumo sokuba ahoxiswe amasosha atshalwe eDemocratic Republic of Congo ukuyosiza uhulumeni wakuleliya lizwe ukulwa namavukela-mbuso ophiko iM23.
Lesi sinqumo sithathwe namuhla ngoLwesine engqungqutheleni ebihlanganisa abaholi balawa mazwe. Kuthiwa ukuhoxiswa kwalawa masosha kuzokwenziwa ngokwezigaba.
Lawa masosha atshalwa kuleliya lizwe ngokwemizamo yeSADC yokudala ukuthula khona. Kuzokhumbuleka ukuthi ngoMasingana (January) kufe amasosha awu-14 aseNingizimu Afrika ebulawa ngamavukelambuso eM23 eDRC, okuthiwa esekwa wuhulumeni waseRwanda.
Abaholi beSADC bathi nakuba amasosha ezosuswa eDRC, kodwa le nhlangano izoqhubeka nokwelekelela imizamo yokudala ukuthula nozinzo kuleliya lizwe.
I-M23 iyaqhubeka nokududula amasosha aseDRC njengoba kuthiwa ngenyanga edlule athathe iBukavu, okungelinye lamadolobha amakhulu kuleliya lizwe.
