IRichards Bay FC izenzele phansi iguqa isekhaya
esicongweni ngokuguqisa iTS Galaxy ngo-1-0 eMbombela Stadium, eNelspruit.ISITHOMBE NGABE: BACKPAGEPIX
SENZO SOKHELA
ISIYIBAMBE ngesandla esisodwa inkomishi yeDStv Premiership iMa-melodi Sundowns elokhu ishoshele njalo esicongweni se-log.
IDowns iguqise ngo-1-0 iTS Galaxy koweDStv Premiership izolo ngeSonto ntambama eMbombela Stadium, eNelspruit.
Igoli okunqobe ngalo iDowns livalelwe enethini nguPeter Shalulile.
IGalaxy ike yathola iphenathi kulo mdlalo kodwa uLindokuhle Mbatha wayishaya yavinjwa nguKennedy Mweene obesezintini.
Le wini yenze iDowns yavula igebe lamaphuzu angu-7 esicongweni se-log.
Inamaphuzu angu-57 emidlalweni engu-26.
Ilandelwa ngamaZulu anamaphuzu angu-50 emidlalweni efanayo.
Ukunqoba kweDowns lo mdlalo kwenza kubukeke isiyibambe ngesandla esisodwa inkomishi yeligi njengoba sezibheke enta-njeni.
Sekusele imidlalo emine kusongwe iligi.
U-Andile “Gattuso” Jali odlala esiswini kwiDowns oqokwe njengomdlali ovelele uthi bayakwazi okufanele bakwenze uma sekuyilesi sikhathi sesizini.
‘’Sikujwayele ukuba kulesi simo aba-qeqeshi bahlale besiyalela ukuthi kufanele siqaphelisise uma sekuyilesi sikhathi sesizini.
“Siyayazi nendlela okufanele sidlale ngayo ukuze sinqobe iligi.
“Isezandleni zethu manje izophunyulwa yithina,’’ kusho uJali.
U-Owen da Gama ololonga iGalaxy uthi bazenzele bona phansi kulo mdlalo.
“Angikholwa ukuthi bekufanele sihlulwe kulo mdlalo sakhe inqwaba yamathuba sangawasebenzisa.
“Size sathola iphenathi nayo sayishweba.
“Kodwa-ke ngiyifisela inhlanhla iSundo-wns izinto zivune yona yize ngikholwa wu-kuthi bekungafanele sihlulwe kulo mdlalo,’’ kusho uDa Gama.
Khonamanjalo, iRichards Bay iphinde yalahla amaphuzu iguqiswa ngo-2-1 yiJDR Stars koweGladAfrica Championship izolo ngeSonto ntambama eMhlathuze Sports Complex, eRichards Bay.
Ukuhlulwa kweBay kwenze yalahleke-lwa yindawo yayo okokuqala esicongweni selog ebisihlale kuyo amasonto angu-10.
USimo Dladla ololonga iBay uthi babe neshwa kulo mdlalo.
“Umdlalo besiwuthwele konke sikwenza kahle ukuya phambili, inkinga ibe semuva.
“Asizange simake kahle emuva senze inqwaba yamaphutha. Besazi ukuthi ba-yikilabhu enabadlali abajikanayo sazama ukubabamba.
“Kodwa-ke ithemba asikalilahli, sisazoqhubeka nokulwa.”
UNnditsheni Nemasisi ongumqeqeshi weJDR uthi bekungafanele bawunqobe lo mdlalo, babe nenhlanhla.
“Besazi ukuthi iBay njengoba idlalela ekhaya izofuna ukusihlasela ngamandla bese yenza amaphutha. Wonke amagoli esiwatholile kube ngamaphutha abawenze bexhamazela.
“Kodwa-ke uma singakhuluma iqiniso bekungafanele siwunqobe lo mdlalo, bebengaphezulu kwethu ngayo yonke into.
Ibhola linjalo-ke. Ufike udlale kahle kodwa unganqobi.
“Sijabule ngalo mphumela ngoba nathi sifuna ukuzibekisela indawo kuma-play-offs ngoba ithuba sisenalo,” kusho uNemasisi.
