BHEKI NDLOVANA
IKHUZA ibuya imikhumbi kanokusho yokungcebeleka, eheha izinkumbi zezivakashi eThekwini.
NgoMgqibelo womhla ka-11 kuLwezi (November), iTransnet National Ports Authority (TPNA), eThekwini neDurban Tourism bazokwethula ngokusemthethweni ukuvulwa kwezikhathi ezintsha zokuhamba kwale mikhumbi enyakeni u-2023/24.
ENingizimu Afrika le mikhumbi ihamba ngesikhathi sasehlobo, kuvalwe ebusika.
Imvamisa – iningi layo okungeyeMediterranean Shipping Company (MSC) yaseSwitzerland – isuka eThekwini iye ePortuguese Island nasePomene, eMozambique.
Kulo nyaka kuzovulwa ngomkhumbi iVasco Da Gama, ozotheleka uthwele izivakashi esikhumulweni esisha semikhumbi yokungcebeleka esivulwe ngo-2021 eThekwini, iNelson Mandela Cruise Terminal.
Ngokolwazi oluhlinzekwa yi-AIS Hub, njengamanje lo mkhumbi (Vasco Da Gama) uphumule eCape Town, lapho ofike khona ngoLwesine.
Umkhumbi iMSC Splendida, yiwona ozokube wehla wenyuka, utetemukisa izivakashi e-Indian Ocean naseSouth Atlantic Ocean.
ILANGALempelasonto lishicilele iSplendida iphumule esikhumulweni iPort of As Suways / Suez Port, e-Egypt.
Kulindeleke ukuba isuke lapho, yehle njalo ize izofika eThekwini lapho izobe isilindwe ngabomvu ngabathandi bokugcebeleka olwandle.
bhekin@ilanganews.co.za
