MTHOBISI SITHOLE
AYIZISOLI iSadtu ngokuphazamisa uNgqongqoshe wezeMfundo eyisiSekelo, uNkz Siviwe Gwarube embizweni kaMengameli wezwe uMnu Cyril Ramaphosa ngesonto eledlule eThekwini. Inyunyana yoThisha i-South African Democratic Teachers Union (Sadtu) iveze lokhu esithangamini sabezindaba eThekwini namhlanje ngoLwesibili, ikhala ngezinkinga ezikhungethe izikole esifundazweni iKwaZulu-Natal. UNobhala weSadtu KwaZulu-Natal uNkz Nomarashiya Caluza uthi ukungahloniphi kukangqongqoshe izinkinga zothisha, yikhona okubacasulayo.
“Ungqongqoshe uhluleka ukulalela umqashi washe okungumengameli wezwe. Akavumanga ukusayina umthetho weBella Bill ngoba elandela okushiwo yiqembu lakhe, uyakhohlwa ukuthi akasiyena ungqongqoshe wenhlangano yepolitiki. Sinezinkinga eziningi ezingalungisekile ezikoleni okufanele engabe uyazisukumela, okusho ukuthi yena ulwa nezinguquko ezinhle ezizothuthukisa imfundo yabantwana,” kusho uNkz Caluza.
Uthi bakhala ngokungakhokhelwa kwezikole izimali zezinsiza kusebenza. Uveze ukuthi kusukela nyakenye izikole zidonsa kanzima. Uthi kulo nyaka zinkulu kakhulu izinkinga njengoba kubhalwa izivivinyo kushoda ngisho amaphepha okugaya.
mthobisis@ilanganews.co.za
