THANDI ZONDI
KUYALWA umphakathi ngokusebenzisa iziqhumane ngendlela okuyiyo njengoba sekusondele uNcibijane. Okhulumela uMasipala weTheku, uNkk Gugu Sisilana, unxuse abantu ukugwema ukusebenzisa iziqhumane ezingekho emthethweni, wabakhumbuza nangoku-baluleka kokuzisebenzisa ngokucophelela. Uthe umasipala usebenzisa umthetho obizwa ngeNuisances and Behaviour in Public Places By-law neNational Control of Explosives/ Fireworks ukuqinisekisa ukuphepha kwezakhamizi nezilwane ngesikhathi sokuqhunyiswa kweziqhumane. Uxwayise ngokuthi otholakala ephula le mithetho, uzohlawuliswa. Uthe ingane eneminyaka engaphansi kuka-16 kayivunyelwe ukubamba
isiqhumane kungekho umuntu omdala oyibhekile.
Amathiphu OKUPHEPHA:
– Qinisekisa ukuthi izingane nabangani baneso elibaqaphile ngaso sonke isikhathi uma beseduze neziqhumane;
– Gcina imfuyo endaweni ephephile futhi evalelekile, ukuze ingawuzwa umsindo weziqhumane;
– Iziqhumane kumele zisetshenziswe endaweni evulelekile, ephandle;
– Ungalinge ubambe isiqhumane ngesandla ngoba ungalimala;
– Ungasibhekisi komunye umuntu, emotweni noma esilwaneni isiqhumane;
– Uma singaqhumi, ungasheshi ukuphinda usilayithe, linda noma yimizuzu ewu-15 ngaphambi kokuzama futhi;
– Beka ibhakede lamanzi eduze noma okokucima umlilo uma kwenzeka ingozi;
– Sebenzisa isiqhumane ulandela imigomo ebhalwe kuso;
– Qinisekisa ukuthi izimpahla ozigqokile kazisondeli noma kazilengeli esiqhumaneni ngesikhathi usokhela;
– Ungalinge wokhele isiqhumane entweni evalekile;
– Ungasokheli isiqhumane udle amponjwana noma isidakamizwa.
* Onolwazi ngendawo edayisa iziqhumane ngokungemthethwo angafo-nela iMetro Police ku-031 361 0000 noma iSAPS ku-10111.
tzondi@ilanganews.co.za
