DKT THABILE MTHEMBU
NAMUHLA kule ngosi sizokhumbuzana ngezitho zomchamo. Uma sikhumbula kahle, sathi emlonyeni wesinye kwabesilisa, kunendlala ebizwa nge-prostate. Masikhumbuzane imisebenzi yayo:
* Ikhiqiza uketshezi olundlalela ukuphuma kwesidoda. Uma sikhumbula, sathi umchamo uyi-acid kanti isidoda siyi-alkaline. Lokhu-ke kungenza ukuthi imbewu (sperm) esesidodeni ife nokufa uma ingahlangana nomchamo ngenxa ye-acid. Phela isidoda siyingubo yembewu, evikela ukuba ingafi kalula.
Lolu ketshezi olundlalelayo lunciphisa i-acid, okwenza ukuthi imbewu ingalinyazwa yi-acid yomchamo, kwazise kwabesilisa umchamo nesidoda kuphuma epayipini elilodwa.
* I-prostate ikhiqize noketshezi oluba wumphako wembewu esesidodeni. Khumbula phela ukuthi imbewu ingahlala izinsuku ezimbalwa uma isifike kowesifazane, okusho ukuthi isizwa yisidoda esiba wumphako wendlela futhi siyivikele.
* Lolu ketshezi lwengeza nobuningi besidoda ngisho sazi ukuthi kalubambi iqhaza elikhulu kulokhu, kodwa ngama-seminal vesicle aneqhaza elikhulu lapho.
Phakathi kwi-prostate kunaleli payipi elikhipha umchamo. Kaligcini nje ngokukhipha umchamo, kodwa siyazi ukuthi nesidoda siphuma kulo.
Kwi-prostate yilapho ipayipi lesidoda lingena khona kwelomchamo, leli esilibiza nge-urethra, okuyilona esizokhuluma ngalo namhlanje.
Iyini i-urethral stricture?
Lokhu kusho ukuncipha kobubanzi be-urethra, okungadalwa yizinto ezihlukene. Nazi ezinye zazo:
* Yizifo ezithelelana ngocansi. Lapha sikhuluma ngezinto ezinjenge-drop;
. Ukufaka ipayipi lokuchama noma ukwenza amanye ama-procedure akwi-urethra;
. Ukulimala noma ukushayeka.
Yiziphi izimpawu ezenziwa yi-urethral stricture?
4 Ukuchama kaningi;
4 Ukuconsa komchamo;
4 Ukudinga ukuba ufuqe uma uchama;
4 Amaconsi uma uqeda ukuchama;
4 Ukuba nezimpawu zama-urinary tract infection (amagciwane asemgudwini wokuchama);
4 Ukuzwa sengathi kawuqedile ukuchama yize usuqedile.
Uma nizibuka kahle lezi zinkinga ziyefana nezokuvuvukala kwe-prostate, lokhu esikubiza nge-benign prostatic hyperthrophy.
Uma uzibona unezinye zalezi zinkinga, kubalulekile ukusukuma uthole usizo emtholampilo noma kudokotela.
* Uma unesifiso sokusoka, uDkt Thabile Mthembu ukwenza mahhala lokhu kepha kumele ufone kuqala ukubhukha. Usebenzela eBlue Clinic, eMaxwell Centre ngaseCity Hospital, eThekwini. Utholakala enombolweni ethi: 031 309 1832.
* Uyatholakala nasezinkundleni zokuxhumana ngala madilesi:-
Instagram: @the.blue.clinic
@the_blue_clinic
@The Blue Clinic by Dr Thabile
Youtube
@The Blue Clinic Dr Thabile
