IGUTSHUZELWE yifu elimnyama iNdlunkulu yesizwe samaZulu kulandela ukudlula emhlabeni koMntwana uFunda Zulu, obengumdidiyeli wamabutho aKwaMandlakazi.
Umthombo weLANGA ulitshele ukuthi umufi uhlaselwe wukugula okumthathe izinsukwana, kwabe sekuyamenela.
UMntwana Funda ubengumdidiyeli wamabutho aKwaMandlakazi, esekwa nguMnu Nkosikhona “Phakel’umthakathi” Ndabandaba odume ngokuqhuba imikhankaso yokukhuliswa kwezinsizwa, noKhathide “Tshath’ugodo” Ngobe ongumsakazi woKhozi FM.
Umufi ubeteketiswa ngelikaSuper-loze (Super-Rose) uma egiya nalapho uma ehola ibutho lesizwe saKwaMandlakazi.
“Bekungekhona okokuqala elaliswa esibhedlela ngenxa yokuhlaselwa yikhanda. Sishaqekile sonke uma sithola umbiko wokuthi akasekho emhlabeni,” kusho umthombo.
ILANGA lixhumene noPhakel’mthakathi oshaye ngamafushane, wathi: “Ngishayekile uma ngithola umbiko, kodwa-ke akukho engizokuphawula njengoba indlunkulu ibingakasho lutho,” kusho uNdabandaba.
