SENZO SOKHELA
KUVELA isizathu esenze i-Orlando Pirates yengeza ilungu elisha ethimbeni layo labaqeqeshi nje-ngoba isanda kuqasha uMandla “Mhloli” Ncikazi (osesithombeni).
UNcikazi wethulwa nje, beku-ngakapheli zinsuku ezingaki ehlukane neLamontville Golden Arrows abengumqeqeshi wayo. I-Arrows noNcikazi bavumelane ngokuthi ngeke bazidalule izizathu zokwehlukana, bacela nokuthi kuhlonishwe lokho.
ILANGA lihletshelwe ngumthombo walo isizathu ese-nze iBucs yaqasha uNcikazi.
Lo mthombo ongaphakathi kwiBucs, uthe: “Ngesikhathi i-Arrows idedela uNcikazi, iPirates igxume yahlala ngoba kudala yaqala ukuthungatha umuntu obezovala isikhala esivuleke kuha-mba uRhulani Mokwena osekwiMamelodi Sundowns.
“UNcikazi uzokuba ngumsizi wokuqala womqeqeshi. Usihlalo (u-Irvin Khoza) ujabule ngokuthola uNcikazi, ubona ezokuba yisixazululo ezinkingeni ezibhekene nale kilabhu kwazise wenze kahle kwi-Arrows (eyihola iqeda kuno-mbolo 4 kwi-log okokuqala ngqa emlandweni wale kilabhu).
“Ithimba lakhe labaqeqeshi ubelibona lingaqinile kahle, yingakho esevive ngobuchopho obusha futhi obunesipiliyoni.
“Kodwa-ke amqashele khona yibhola elihle ebelidlalwa yi-Arrows ngaphansi kukaNcikazi, ufuna nePirates idlale ibhola elihehayo lalapha eMzansi okuyinto angayiboni njengamanje eqenjini lakhe,” kusho umthombo.
Leli phephandaba like lazama ukuxoxa noNcikazi kodwa kwa-nhlanga zimuka nomoya njengoba kuthiwa unqunywe umlomo ukukhuluma nabezindaba.
Imizamo yokuthola uKhoza iphunzile njengoba ucingo lwakhe belungangeni.
