MFANAFUTHI NDLOVU
IZOLWELA ukunqoba izinhliziyo zabathandi bakanobhutshuzwayo baseThekwini namaphethelo ukuze baye ngobuningi emlenzeni wesibili
womdlalo owandulela owamanqamu weMTN8 iStellenbosch FC eqeqeshwa nguSteve Barker (osesithombeni) ezogadulisana neMamelodi Sundowns mhla ka-1 kuMandulo (September) eMoses Mabhida Stadium, eThekwini.
IStellies inqume ukuyigijimela eThekwini imidlalo yasekhaya njengoba kusalungiswa iDanie Craven Stadium, eWestern Cape, okuyiyona ikhaya layo.
Le nkundla kukhalwe kakhulu ngayo ngesikhathi iStellies iwashisa iTS Galaxy ijezi kwi-quarter final yeMTN8.
URob Bernadie oyisikhulu esiphezulu kwiStellies, utshele ILANGALempelasonto ukuthi bazosebenzisa imidlalo yomzuliswano wokuqala wokuhlungela ukungena kwiCaf Confederation Cup ukuheha abalandeli baseThekwini
ukuyobuka yonke imidlalo le kilabhu ezoyidlalela kuleli dolobha, kubalwa noweMTN8. Uthe bazimisele ngokuhamba ibanga elide nakwiCaf, ukuthola isipiliyoni sokugijima imidlalo yase-Afrika.
Okwenza iTheku balithande abeStellies wukuthi yilapho benqobe khona isicoco sabo sokuqala esigabeni esiphakeme, bequkula iCarling Knockout ngokuguqisa iTS Galaxy ngesizini edlule.
