THANDOLUHLE NGUBO
KUBANJWE umoya ngesinqumo esigodlwe yiNkantolo yezoKhetho, odabeni oluphakathi kweDA nomengameli wezwe, uMnu Cyril Ramaphosa, lapho leli qembu limsola ngokwephula umgomo wezokhetho, wakhankasela i-ANC emphakathini yize yayisivaliwe imikhankaso yamaqembu.
Isenzo seDA sishiye imibuzo ngobudlelwano bayo ne-ANC kuhulumeni wobumbano. Emaphepheni afakwe yiDA enkantolo, ithi ifuna uhulumeni uphuce i-ANC u-1% wamavoti, uRamaphosa ahlawuliswe u-R200 000 i-ANC yona ihlawuliswe u-R100 000. Ngaphambi kokusongwa kwecala izolo ngoLwesine, ummeli kaRamaphosa, uMnu Ngwako Maenetje, uthe ukholwa ukuthi iDA iwubuka iwuhlanekezele lo mthetho ethi umengameli wawephula, kwazise uRamaphosa wayengakhankasi. Okhulumela iDA, uMnu Willie Aucamp, uthi leli cala bazolilandela kuze kufike esiphethweni, yize bekuhulumeni owodwa ne-ANC.
“Ukuba kuhulumeni wobambiswano ne-ANC akusho ukuthi kumele siyeke ukuhambisa izinto ngokomthethosisekelo wezwe. Sizoqhubeka nje nokuwuvikela (umthethosisekelo) ukuze uhlonipheke,” esho.
