“Kubhuntshe” owe-ANC wokuyoshweleza eSilweni ngesenzo sikaDuma

198

JOHN HLONGWA

KUQUBUKE indida ngoLwesihlanu “kubhuntsha” umhlangano obekulindeleke ukuba i-ANC KwaZulu-Natal, iyoshweleza kuwo eSilweni uMisuzulu kaZwelithini ngesenzo sikasihlalo wayo, uMnu Siboniso Duma, owahlwitha umbhobho kundunankulu waso, uMfu Thulasizwe Buthelezi esakhuluma. Sekuwumlando ukuthi uDuma wenza lokho esikhumbuzweni seSilo uDinuzulu kaCetshwayo KwaCeza phambi kweSilo noMengameli Cyril Ramaphosa.

Ekhuluma naleli phephandaba uSihlalo weNdlu yabaHoli boMdabu KwaZulu-Natal, iNkosi uSifiso Shinga, uthe: “Ngike ngayibona incwadi becela ukuyobonana neSilo. Ngokwazi kwethu, lowo umhlangano ubhuntshile. Amakhosi ahlanganile esishayamthetho esidala oNdini, avumelana ngokuthi uDuma kumele aqale kuwona ngaphambi kokuba aye eSilweni.” 

Okhulumela i-ANC KwaZulu-Natal, uMnu Mafika Mndebele, utshele ILANGA  Lempelasonto ukuthi umhlangano kawubhuntshanga, kodwa babelinganisa ukuthi ungaba nini. “La mahlebezi abhebhethikiswa ngabezindaba, kasikaze silusho usuku, kodwa besingathekisa ukuthi kungaba yizolo (esho uLwesihlanu). Esikutholile wukuthi ngeke siye sodwa siyiqembu endlunkulu, kumele sikhashwe ngamakhosi. Ngingasho njengamanje ukuthi sesikwenze konke, sesilinde usuku lokuya eSilweni,” kusho yena. 

Uveze ukuthi uMengameli Ramaphosa ukhathazekile ngokuthi kungenzeka kuqubuke udlame. “Sixolisile kumengameli wezwe, naye uDuma uzixolisele. Umengameli uthe makungaphinde kwenzeke lokho. Simbikelile ukuthi sesibhalele uMengameli we-IFP, uMnu Velenkosini Hlabisa, simcela ukuba siqhubeke, sixoxe ngokwakha uxolo. UNdunankulu kaZulu, uMfu Buthelezi naye kumele ngabe wenza okufanayo, axolise ngesenzo sakhe,” kusho uMndebele. 

Iphunzile imizamo yokuthola uvo lwasendlunkulu kwazise izingcingo bezikhala, zingaphendulwa. 

hlongwaj@ilanganews.co.za

Previous article“USenzo noJason” bazobonakala emdlalweni owodwa
Next article25 March 2024