Kume ukufunda kubulawa unogada emagcekeni esikole

1288

THANDOLUHLE NGUBO

KUPHAZAMISEKE ukufunda nomhlangano wabazali ngoLwesihlanu, esikoleni iMafunda Secondary, eMbongolwane, EShowe, kudutshulwa kubulawa unogada walesi sikole esemagcekeni aso. Ngokuthola kwaleli phephandaba kubikwa ukuthi uMnu Bongani Mhlongo (55), obephinde abe yilungu lenhlangano yeSikebhe elwa nobugebengu kule ndawo, udutshulwe ngabasolwa abangaziwa ngesikhathi kuqhubeka umhlangano wabazali, obubanjelwe ngaphakathi emagcekeni alesi sikole.

Kubikwa ukuthi ngesikhathi kuqhubeka umhlangano wabazali uMhlongo ubengaphandle nabanye babafundi kulesi sikole, kwabe sekuqhamuka imoto yohlobo lwe-Toyota Etios emhlophe ebeyingenazo izinombolo, yangena emagcekeni esikole, kwadilika umsolwa wadubula ephindelela ebhekise kuMhlongo, washonela endaweni yesigameko. Ikhansela lendawo uMnu Mbongiseni Ntuli, uzwakalisa ukudumala ngalesi sigameko, utshele leli phephandaba ukuthi ubephuma komunye umnhlangano womphakathi ngesikhathi ehlangana nabafundi baseMafunda begcwele umgwaqo singakashayi isikhathi sokuphuma kwesikole.

Ubike ukuthi nakuba engenaso isiqiniseko nomsuka wokuhlaselwa kukaMhlongo, kodwa ungowesibili (uMhlongo) ukuhlaselwa emalungwini ale nhlangano yeSikebhe kule ndawo.
“Ngithe uma ngizibuza izingane zangilandisa ngesigameko esesenzeke esikole, zithi kungene imoto wahlaselwa ekhuluma nabanye abafundi egcekeni lesikole. Ngeke ngiqinisekise ukuthi ukuhlaselwa kukaMhlongo kuhlobene noma cha, nomsebenzi wokuvikela umphakathi abewenza ngaphansi kweSikebhe, kodwa ngonyaka owedlule kwahlaselwa, kwadutshulwa kwabulawa owayengusihlalo wale nhlangano. Imininingwane ephelele yalolu daba angikabi nayo,” kusho uNtuli.

Leli phephandaba likhulume nomfowabo kaMhlongo, uMnu Bukisisa Mhlongo, oveze ukuthi isigameko sokubulawa komfowabo simethusile. Ubike ukuthi nakuba zibe khona izigameko ezehlele umfowabo ngonyaka owedlule kodwa zagcina ziphelele emoyeni.
“Ngethuke kakhulu ngesikhathi ngithola ucingo lungazisa ngesigameko esehlele umfowethu. Kungimangazile ukuzwa ukuthi usesishiye ngale ndlela, ngoba ngokwazi kwami ubengumuntu obephilisana kahle nabanye abantu. Bengakaze ngizwe ukuthi kukhona abamusabisayo, kodwa engikukhumbulayo ukuthi ngonyaka ophelile kwagasela amaphoyisa emzini wakhe umfowethu, athi ahletshelwe ngothile esagcina singamazanga ukuthi kunezibhamu ezigcinwe emzini kamfowethu, agcina engazitholanga. Ngemuva kwaleso sigameko akukho okunye engake ngakuzwa okufana nalokho” esho.

Okhulumela uMnyango wezeMfundo KwaZulu-Natal uMnu Muzi Mahlambi ubike ukuthi imibiko etholwe umnyango iveza ukuthi uMhlongo akahlaselwanga, kodwa uthole amachaphazelo ezama ukulamula.
“Esikutholile ukuthi ngesikhathi kuqhubeka umhlangano wabazali, kuxabane abanye bakhiphelana isibhamu, unogada ube esedubuleka ngesikhathi ezama ululawula isimo. Sithi dudu emndenini walo,” Kusho uMahlambi.
Okhulumela amaphoyisa KwaZulu-Natal uCol Robert Netshiunda usiqinisekisile isigameko.

“Amaphoyisa aseMbongolwane aphenya icala lokubulala ngemuva kokudutshulwa kubulawe unogada wesikole ngoLwesihlanu. Imibiko iveza ukuthi kuqhamuke imoto emhlophe enamafasitela amnyama, kwadilika umsolwa waqonda kumufi, wadubula ephindelela ebhekise kuye, washonela khona lapho. Umsolwa ube esebaleka, amaphoyisa ayamthungatha,” kusho uNetshiunda.

Previous articleUbalisa ngamanesi onendodakazi ‘eboshelwe ukuzama ukubulala usana’
Next articleUmhlaziyi uwubona uyingozi uMkhonto Wesizwe