NONHLAKANIPHO SHINGA
IQEMBU i-IFP selimise lowo onguSihlalo wombutho wentsha, i-IFPYB, uMnu Sanele Zondo ukuze abhekane nezindaba zomndeni wakhe. Esitatimendeni esikhishwe yileli qembu, uMnu Zondo umiswe okwesikhashana ukuze abhekane ngqo nesimo sakhe sasekhaya kulandela okukhulunywe yinkosikazi yakhe ezinkundleni zokuxhumana uNkk Simenyiwe Zondo, obekade ebikwe njengomuntu onyamalele. Kuzokhumbuleka ukuthi uMnu Zondo nomndeni wakwaDlomo lapho kuzalwa khona uNkk Zondo, bahlabe umkhosi ngemuva kokunyamalala kwakhe ngoLwesihlanu olwedlule.
Izolo uvumbuke ezinkundleni zokuxhumana lapho egeqe khona amagula ngokuhlukumezeka kanjalo nokungahlali kahle emzini wakwaZondo selokhu ashada ngoNdasa. Konke okushiwo nguNkk Zondo ezinkundleni zokuxhumana uMnu Zondo ukuphike walala ngomhlane. Leli qembu liphinde lamvala ekutheni akhulume ngalolu daba lathi yilo elizophendula uma kunesidingo. UMnu Zondo uphinde abe yilungu lePhalamende,nakuwona lowo msebenzi umisiwe okwesikhashana.
