Kusolwa ingxabano yomndeni ngokubulawa kwenyanga “ebizingelwa”

380

PHUMLANI GAMA

KUTHIWA ibizingelwa inyanga yaseSiweni, eBhambanana edutshulwe nomkayo besemzini wabo ngoLwesibili ntambama. 

UMnu Adam Mpontshane (63), kuthiwa udutshulwe ngabalisa abathathu abangene endlini abebehleli kuyona. 

Leli phephandaba lithole ukuthi kubanjwe umoya ngempilo yenkosikazi kamufi elaliswe kwesinye sezibhedlela zaKwaZulu-Natal. 

Kuthiwa le nyanga ibizingelwa ngababulali njengoba ibisisinde izikhawu eziningana bezama ukuyisoconga.

Ngakolunye uhlangothi, kusolwa impi yomndeni ngokufa kwayo. 

Ilungu lomndeni elikhulume naleli phephandaba – ngaphansi kombandela wokuba kugodlwe imininingwane yalo – lithe umufi ubesephenduke umzondo kwamanye amalungu omndeni. 

“Inkinga ekhona wukuthi kasizwani siwumndeni. 

“Kasikungabazi ukubulawa kukababa uMpontshane kuwumphumela wokungezwani komndeni,” kusho lona. 

Enye yamadodana kamufi, uMnu Nkululeko Mpontshane, ithe isinde ngokulambisa kulesi sigameko. 

“Ngiphume ngefasitela kukubi. 

“Udadewethu omncane usindiswe wukuziphonsa efrijini. 

“Kungene abalisa abathathu bengakhulekanga ekhaya, bavulela ngenhlamvu bebhekise kubazali bethu. 

“Ubaba ubeyinyanga eyaziwayo. Ababulali bazame kaningi ukumdubula, okuthe uma bebona ukuthi izinhlamvu kazimbulali, bakhipha ummese, bamgwaza,” kusho indodana kamufi.

Okhulumela amaphoyisa KwaZulu-Natal, uLt-Col Nqobile Gwala, uthe amaphoyisa
ayaphenya ngalolu daba.

phumlani@ilanganews.co.za

Previous articleKukhuzwa umkhuba wokucwasa abanesifo sengqondo
Next articleInkosi idilizelwe “ukungahloniphi” isihlalo