Kuzobusiswa izifundiswa zamaNazaretha eBuhleni

637

JOHN HLONGWA

KULINDELEKE ukuba kuqopheke umlando ebandleni lamaNazaretha ohlangothini lwaseBuhleni oluholwa yiNkosi uMduduzi “Nyazilwezulu” Shembe (esesithombeni) njengoba lizoba nomcimbi iNazareth Baptist Church Graduate Ceremony mhla ka-24 kuNdasa (March), e-Inkosi Albert Luthuli International Convention Centre (ICC), eThekwini. 

Lo mcimbi – ohlelwe yi-Isiqebetho seNhlalamafini Executive, okuyikomiti laleli bandla – ngokubambisana nazo zonke izinhlaka zeba – kuhloswe ngawo ukubungaza izifundiswa zebandla. 

Ekhuluma egameni lekomiti uDkt Ngogi Mahaye weThempeli eKuhlonipheni, eNkandla, uthe: “Namuhla kufezeke isibonakaliso (isipholofetho) seminyaka. Kwakuyiphupho likaMqaliwendlela (umsunguli waleli bandla, umPhrofethi Isaiah Shembe) ukuthi leli bandla liqhakambise imfundo. Uzokhumbula ukuthi amadodana akhe amabili, uJohannes Galilee no-Amos Khula Shembe ayeyizifundiswa. 

“Nawo aweseka kakhulu umbono kayise. Lo mbono udlulele naseNkosini uVimbeni ‘Thingolwenkosazane’ Shembe neNkosi uNyazilwezulu. Kuzobe kungokokuqala lo mcimbi wenziwa. Kuzobe kuhlangene izifundiswa zebandla zizozibongela ngezikuzuzile. Lokhu kasifuni kugcine ebandleni, kodwa kumele kudlulele nasemphakathini. Kumele imfundo siyenze ibe sesitayeleni. “Sifuna ukuba izifundiswa zebandla zi-thole inkundla yokucobelelana ukuze zinikele ngalokho ezinganikela ngakho. 

“Sicela bonke abebandla abafisa ukuba yingxenye yalolu suku balandele izindlela zokuxhumana ezisesikhangisweni. Bazo-thumela yonke imininingwane yabo. Njengamanje zibalelwa ngaphezulu kuka- 200 izifundiswa zebandla esezibhalisile. Ngelanga lomcimbi kulindeleke ukuthi izifundiswa zigqo-ke amajazi azo,” kusho uMahaye.

Uveze ukuthi uNyazilwezulu luzobe luyingxenye yalo mcimbi ukuze lubusise izifundiswa.

Okhulumela ibandla ohlangothini lwaseBuhleni, uMnu Lizwi Ncwane, uthe: “Kwaba yisibonakaliso soMqaliwendlela ukuthi abantwana bonke bayiswe ezikoleni bayothola imfundo.” hlongwaj@ilanganews.co.za

Previous articleAkaqali ukuthinteka kwelokubulala osolwa ekufeni kowe-IFP
Next articleKukhuthazwe abakwasidlodlo “ukugingqa” izigebengu kufihlwa iphoyisa