LUCKY CAIN
UMENGAMELI weNational Freedom Party, uMnu Ivan Barnes (osesithombeni), usephumele obala ngamaqembu asekhombise intshisekelo ngokusebenza neqembu lakhe kuhulumeni wokuba-mbisana KwaZulu-Natal, njengoba lithole isihlalo esisodwa esishayamthetho futhi kuyilona elibhekiwe ukubamba iqhaza elikhulu kulesi sifundazwe.
Leli qembu lisematheni kulezi zinsuku njengoba isinqumo salo kungase kube yisona esakha uhulumeni wobumbano uma kuhlangana i-IFP, i-ANC neDA.
Womathathu la maqembu akha izihlalo eziwu-40 eSishayamethetho saKwaZulu Natal, esinezihlalo eziwu-80. Ngakho isihlalo seNFP yisona esingavuna la maqembu akhe uhulumeni wobumbano kwazise iMK Party ne-EFF akha izihlalo eziwu-39 uma behlangene.
Ekhuluma neLANGA uBarnes, uqale ngokucacisa ukuthi akukho okuzoshintsha ngohlu lwamagama alabo abazobamela esishayamthetho.
Uthe njengoba uNkk Mbali Shinga – ongisihlalo weNFP kulesi sifundazwe – engowokuqala ohlwini, nguyena ozoqhwakela kulesi sihlalo esiShayamthetho saKwaZulu-Natal.
Utshele leli phephandaba ukuthi iqembu lakhe selithole izimemo zamaqembu amabili, okuyi-IFP ne-ANC ngenhloso yokuthi kube nobudlelwano bokusebenzisana.
Uthe bazimisele ukuhlangana nala maqembu ukuze bezwe ukuthi afuna ukuthini, futhi anaziphi izinhlelo ngalolu hlobo lukahulumeni.
Uqhube ngokuthi isinqumo abasithathayo sizocatshwa yimihlangano nala maqembu.
