Uncele ulwazi ehambele e-United Kingdom
PHILANI NCALANE
UHLELA ukubuya ngezimpi zomhlaba uThulani “Nkunzi” Magudulela weLudonga Boxing Promotion osezakhele igama ngokuhlela izimpi KwaZulu-Natal.
UMagudulela utshele leli phephandaba ukuthi umatasa nezinhlangano zomhlaba ukuze ahlele izimpi ngaphansi kwazo. Uthi yize ezozihlela nezamabhande akuleli kodwa usefuna ukugxila kakhulu kwezomhlaba.
“Ngike ngayisa uSiboniso Gonya e-United Kingdom. Ngihlangane nabantu abaningi esivumelane nabo ngokuhlelwa kwezimpi zomhlaba. Kunezinto ezincane obekumele ngizilungise ukuze sikwazi ukusebenza kahle. Uma nje kuphela le nto yeCovid-19 ngingenisa mawala ezimpini zomhlaba.
“Okunye okubukeka kubambezela wukuthi amabhokisa esiwahlelela izimpi zomhlaba abuye ahambe kulesi sifundazwe. U-Innocent Mantengu bese ngimfake kwi-IBF kodwa waqoma ukuya eGoli bambuyisela ezimpini zakuleli.
“UMoruti Mthalane ngimtakulile waphatha ibhande le-IBO kodwa walishiya ngoba esefuna ukulanda leli aseliphethe le-IBF.
“Lokhu kuyinkomba esobala yokuthi sesikulungele ukungenisa ezimpini zezinga lomhlaba,” kusho uMagudulela.
UMagudulela uthi uzoqhubeka nokuyisa izimpi ezindaweni zasemakhaya yize esefuna ukugxila kakhulu kumabhande amakhulu emhlabeni.
