PHUMLANI GAMA
UPHUMELE obala ngokusenhliziyweni yakhe uMntwana waseZibindini, uThulani, mayelana nokuqokwa komuntu ozothatha isikhundla sikandunankulu kaZulu, esavuleka ngokudlula emhlabeni kweNkosi Mangosuthu Buthelezi (osesithombeni).
UMntwana uThulani owayekhulumela iNdlunkulu kaZulu ngesikhathi seSilo uZwelithjini kaBhekuzulu, uphakamise igama lendodana kaShenge, uNtuthuko Zuzifa Buthelezi.
Ukusho lokhu ngesikhathi enengxoxo ekhethekile naleli phephandaba esigodlweni seSilo uShaka, KwaBulawayo, eDlangubo, eShowe ngoLwesine.
UMntwana uyingxenye yethimba ebelihlele umcimbi wokudodiswa kwabafana. Bekungokokuqala kunalo mcimbi kulesi sigodlo. Kuphakanyiswe ukuba ubekhona minyaka yonke.
“Ngilinde isizwe sakwaButhelezi ukuba siphakamise uMntwana uNtuthuko ukuba abe yiNkosi yakwaButhelezi.
“Lokho kuyobe kuchaza ukuthi useme esitobhini sokuba akhonjwe abe ngundunankulu kaZulu. Phela likhulu kakhulu igalelo loMntwana waKwaPhi-ndangene. Iminyaka ewu-70 esebenzela isiZwe samaZulu, kufanele simhloniphe ngokuthi kungene indodana yakhe. Mina okwami wukuba ngimeseke ngokuphelele uMntwana uNtuthuko.
“Ngimeseke sinabanye abantwana basendlunkulu. Ngaphandle kukaMntwana uNtuthuko, kangiboni muntu ofanelwe wukungena kulesi sikhundla,” kusho uMntwana uThulani.
Ubuye waphumela obala ngokungabonakali kwakhe eMkhosini weLembe owawuKwaDukuza ngoMandulo (September). Uthe yena nabanye badinwa wukuthi uhulumeni wawubeka ngosuku olwandulela olujwayelekile, ngoba ufuna ukuwenza owawo.
