Umbango wezembe nowendawo yesibili uzocaciswa yimidlalo yokugcina ngelizayo
NHLANHLA HUDLA
SEYIPHENDUKE eyamanqamu uqobo imidlalo yokusonga isizini yeDStv Premiership ezokuba ngoMgqibelo esiya kuwona womhla ka-20 kuNhlaba (May) ezinkundleni ezahlukene njengoba umbango wendawo yesibili nowamakilabhu azodliwa yizembe usashisa phansi. IMaritzburg United idonse umoya yehlula iStellenbosch FC ngo-1-0 wegoli lika-Amadou Soukouna ngomzuzu ka-40 izolo eHarry Gwala Stadium, eMgungundlovu, okwenza yasinda okwesikhashana ezembeni. Ukuba yehluliwe kulo mdlalo iTeam of Choice bekuzokube sekuyibhedele kulesi sigaba njengoba ibizoshoveleka kwesiphansi kwazise isabambe ibhuleki. Maritzburg isizwe nayiTS Galaxy egcine iChippa United ibhabhabele endaweni ka-15 kwi-log njengoba iyixebule ngo-4-0 wamagoli kaKamogelo Sebelebele ngomzuzu ka-33 nangoka-52, uMasilake Phohlongo ngoka-88 noNkosikhona Radebe ngoka-92.
IMaritzburg kumele ilwele ukuqoqa amaphuzu agcwele uma seyibhekene neMamelodi Sundowns emdlalweni wala makilabhu wokusonga isizini ozokuba ngoLwesibili ngo-19h30 eLoftus Stadium, ePitoli. Ukwehlulwa kwayo kuzosho ukuyolusa onogwaja ehlathini. Kumele inqobe besimincela ukuthi iGolden Arrows ihlule iChippa United kowokusonga isizini ngoMgqibelo eGqeberha, iphinde ithandazele nokuthi iMarumo Gallants ibhuquziswe yiSwallows ngosuko olufanayo eSoweto. Nasesicongweni umbango usashisa phansi phakathi kwe-Orlando Pirates neSuper-Sport United ababanga ukuqeda endaweni yesibili ukuze bezodlala iCaf Champions League ngesizini ezayo. IBucs izihlinzele ezibini ibambana neSekhukhune United ngo-1-1 izolo e-Orlando Stadium, eSoweto. Igoli leBucs lishaywe nguTerrence Dzvukamanja ngomzuzu ka-31 labulawa ngelika-Edwin Gymah ngoka-38.
Lo mphumela wenze iPirates yaficwa yiSuperSport njengoba la makilabhu esebambene ngamaphuzu awu-51 emuva kwemidlalo ewu-29, nokho amaBhakaniya asizwa yisibalo samagoli amaningi. Emdlalweni wokugcina iBucs izobhekana namaZulu FC ngoMgqibelo eThekwini. USuthu lwehlulwe yi-Arrows ngo-1-0 wegoli likaSiyavuya Ndlovu elingene ngomzuzu ka-54 izolo KwaMashu, okuqede amathuba alo okungena kwi-top 8. ISuperSport iguqise iKaizer Chiefs ngo-1-0 wegoli likaGamphani Lungu ngomzuzu ka-41 ePeter Mokaba Stadium.
- Isiyonke imiphumela yeDStv Premiership imi kanjena:
- Arrows1, AmaZulu 0; Royal AM 0,
Swallows 1; Maritzburg 1,
Stellenbosch 0; SuperSport 1,
Chiefs 0; Pirates 1, Sekhukhune 1;
TS Galaxy 4, Chippa United 0;
Cape Town City 2,
Richards Bay 0.
Imidlalo yokusonga isizini
ka-2022/23 imi kanjena:
NGOLWESIBILI
ELoftus Stadium: Mamelodi
Sundowns vs Maritzburg Utd
19h30.
NGOMGQIBELO
ENelson Mandela Bay: Chippa
United vs Golden Arrows 15h00.
EMoses Mabhida Stadium:
AmaZulu vs Orlando Pirates
15h00.
E-FNB: Kaizer Chiefs vs Cape
Town City FC 15h00.
EPeter Mokaba: Sekhukhune
United vs SuperSport United
15h00.
EDobsonville: Swallows vs
Marumo Gallants FC 15h00.
EKing Zwelithini: Richards Bay
vs Royal AM 15h00.
EDanie Craven: Stellenbosch vs
TS Galaxy 15h00.
