INTATHELI YELANGA
KUPHELE amahlathi okucasha, inhlanzi yashelwa ngamanzi esisebenzini soMnyango wezaseKhaya esibanjwe oqotsheni sithengisela abokufika omazisi. Lona wesifazane (37), osebenza ehhovisi lalo mnyango e-Upington, eNorthern Cape, ubanjwe wuphiko lwe-Anti-Corruption Investigating Unit (ACIU) ngoLwesithathu – emuva kokuncinzwa indlebe ngemikhuba yakhe.
Ubanjwe ematasa nomsebenzi wakhe wobumnyama. Ngokombiko wamaphoyisa, lesi sisebenzi besamukela amantshontsho ngokunika abokufika lab’ mazisi. Sibekwe icala lenkohlakalo, kanti kulindeleke ukuba sivele eNkantolo yeMantshi yase-Upington maduze. Umsebenzi wamalungu e-ACIU – abambe lesi sisebenzi – ushayelwe ihlombe ngukhomishana wesifunda iZF Mgcawu, uMaj Gen Thabo Mphuthi.
