UKadodia uthi kukhona abafuna ukubona ezakhe zidliwa yizembe
SENZO SOKHELA
ISITHOMBE NGABE: BACKPAGEPIX
UMNIKAZI weMaritzburg United ukhala ngokubanjwa inkunzi kwekilabhu yakhe kubuka izwe lonke njengoba ekholwa wukuthi kukhona abafuna ukubona ezakhe zidlala esigabeni seGladAfrica Championship.
IMaritzburg iguqiswe ngo-2-1 yiSuperSport United koweDSTV Premiership ngoLwesihlanu kusihlwa eHarry Gwala Stadium, eMgungundlovu.
Amagoli eSuperSport avalelwe enethini ngoBradley Grobler kwathi eleMaritzburg lona kwaba ngumkhonto ogwaze ekhaya kaRonwen Williams.
Ukuhlulwa kweMaritzburg kuthele usawoti esilondeni kule kilabhu njengoba kuyiyona ebambe ibhuleki emsileni.
Seyihlulwe kuyona yonke imidlalo ngale sizini.
UFarook “Ntshebe” Kadodia ongumnikazi weMaritzburg ushayele leli phephandaba ngoMgqibelo emini yantambama edinwe eqhuma ekhala ngokuthi ubanjwe inkunzi kulo mdlalo.
“Ingiphatha kabi le nto eyenzeka ekilabhini yami, kuyacaca ukuthi kukhona abafuna ukusibona siphumile kulesi sigaba ngendlela izinto ezenzeka ngayo.
“Siqala nje imidlalo yeligi, sithole amakhadi abomvu imidlalo ilandelana.
“Okwenzeke emdlalweni weSuperSport kuvele kwangikhanyela ukuthi kukhona nje abafuna ngiphume kulesi sigaba.
“UGrobler ushaye igoli eliyi-offside kodwa unondweba walikhomba emlotheni.
“Siphinde sancishwa amaphenathi amabili acacile ngaphandle kwesizathu.
“Sengicacelwe ukuthi ngale sizini sizodonsa kanzima kodwa sizolwa kubona lobo bumnyama,’’ kusho uKadodia.
