Sikhathaze ijaji isicelo sommeli kwelikaMeyiwa

303

INTATHELI YELANGA

UMMELI wabamangalelwa ababili ecaleni lokubulawa kukaSenzo Meyiwa owayengunozinti we-Orlando Pirates neBafana Bafana, ucele usuku eNkantolo eNkulu yasePretoria ukuze athi ukudlana indlebe namakilayenti akhe emuva kokuba emmeli wombuso, uMnu George Baloyi ethe laba bamangalelwa bagonyuluka ngokubulala lo nozinti futhi bakhomba kubo kwentombi yakhe, uKelly Khumalo lapho abulawelwa khona. 

Kuzobe sekuqalwa elinye icala phezu kwaleli eliqhubekayo ukuphumputha ukuthi lobu bufakazi – bokuthi abasolwa bagonyuluka – buyasebenziseka yini. Kuvele ukuthi uMuzikawukhulelwa Sibiya wayivuma eyokubulala futhi wakhomba indawo yesigameko kanti uSandiso Ntanzi yena wenza izitatimende ezimbili evuma icala. Nokho-ke ummeli wabo, uMnu Sipho Ramosepele, uthe amakilayenti akhe ayayiphika eyokuvuma icala neyezitatimende okuthiwa azenza. Uthe uNtanzi wakugcizelela ukuthi wahlukunyezwa ukuze asayine isitatimende sokuvuma. Ecaleni lokubulawa kukaMeyiwa, uSibiya noNtanzi bangabamangalelwa noMthobisi Mncube, uMthokoziseni Maphisa noSifisokuhle Ntuli. UMeyiwa wadutshulwa washona ekubo kaKelly, eVosloorus, ngoMfumfu (October) 2014. Eyokucela usuku kukaRamosepele, yenze ijaji, uMnu Ratha Mokgoatheng laphithanelwa yikhanda njengoba belikhathazeke ngokuthi kuzodleka isikhathi sokuqulwa kwecala. Nokho ligcine lilihlehlisele uLwesihlanu.

SOWETO, SOUTH AFRICA – NOVEMBER 02: Senzo Meyiwa during the CAF Champions League Final 1st Leg match between Orlando Pirates and Al Ahly from Orlando Stadium on November 02, 2013 in Soweto, South Africa. (Photo by Lefty Shivambu/Gallo Images/Getty Images)
Previous articleIkuphindile lokho i-EFFSC eMangosuthu
Next articleTHOLA ILANGA KUSASA (12 October 2023)