SENZO SOKHELA
USENGENE ohlwini lwabadlali abagaqelwe nguRulani Mokwena osanda kuqokwa njengomqeqeshi omusha weWydad Casablanca yaseMorocco
uBongani “Ben 10” Zungu osanda kuchithwa, yiMamelodi Sundowns. Leli phephandaba lithole ukuthi uMokwena usefake uZungu – odlala esiswini – ohlwini lwabadlali afuna ukubasayinisa.
Umthombo waleli phephandaba uthe: “UZungu uphezulu ohlwini lwabadlali uMokwena afuna ukubasayinisa kwiWydad. Into asaqala ngayo yithimba lakhe labaqeqeshi. UZungu ungomunye wabadlali uMokwena akholwa wukuthi bazomelekelela ukufeza iphupho labaphathi bale kilabhu. Ingqinamba angase abhekane nayo ngodaba lukaZungu, wukuthi baphethwe ngumphathi oyedwa, uSteve Kapeluschnik, okunguyena obebambe izingxoxo nezikhulu zeWydad ngodaba lukaMokwena. Kodwa-ke uma kungalungi, vele uKapeluschnik uyaxoxa nekilabhu yakhe (uZungu) yakudala i-Amiens SC yaseFrance, uzama ukuthi abuyele kuyona.”
UKapeluschnik ebuzwa ngalolu daba, uthe ngeke akwazi ukuphawula ngalo kwabezindaba.
senzos@ilanganews.co.za
