INTATHELI YELANGA
UPHENDUKE isilomo yize ezakhe zibhubhile yinduku umdlali weBafana Bafana, uLyle Foster (22), ogijima kwiBurnely esanda kukhuza ibuya kwi-English Premiership emuva kokuhamba iyozingela onogwaja kwi-English Championship ngesizini ka-2021/2022. IBurnley – esilazi njengoba izazi izembe njengoba isiye kaningi ehlathini – ibhujiswe yi-Aston Villa ngo-3-1 koweligi, kanti uFoster nguyena oshayele ezakhe igoli lokubika ekhaya. Ushaye elihle igoli ngomzuzu ka-47 ezama ukugqiba akaMatty Cash angene ngoka-8 no-20. Kutte ezakhe zisazama elesibili, zaqedwa umdlandla yisipikili sokugcina esishayelwe nguMoussa Diaby ngoka-61.
Okwenze lo mdlali – owashayela iBafana igoli ihlulwa yiMorocco ngo-2-1 emlenzeni wokuqala kowokuhlungela i-Afcon ngoNhlangulana (June) nyakenye – wukuthi ubeshaya igoli kakhe lokuqala kulesi sigaba. Ungumdlali wesi-9 waseNingizimu Afrika ukushaya igoli kule ligi ekhonzwe kakhulu ngabathandi bakanobhutshuzwayo – ikakhulukazi base-Afrika. Abanye abadlali bakuleli abashaye amagoli kwi-EPL nguBenni McCarthy, uShaun Bartlett, uSteven Pienaar, uPhil Masinga, uQuinton Furtune, uMark Fish, u-Eric Tinkler noMbulelo “Old John” Mabizela.
Umqeqeshi kaFoster, uVincent Kompany – owayeyisitobha seMan City – ukhombisa ukumethemba lo madlali njengoba emqalise kuyo yomibili imidlalo esagijinywe yiBurnley kule sizini. Ezinkundleni zokuxhumana bekubatshazwa ubuhle begoli lalo mdlali, yize ezakhe ziphume enkundleni zibhocobele ngenxa yesibhaxu.
