LUCKY CAIN
IGCINE iliphosile ithawula ngesicoco sikaMiss South Africa intokazi esematheni ngobuzwe bayo, uChidimma Adetshina (osesithombeni), okuqubuke imibuzo ngokungenela kwayo lo mncintiswano emuva kokuputshuka kwezindaba zokuthi uyise udabuka eNigeria kanti unina ngowaseMozambique. Kusukela kuputshuke lezi zindaba, baningi abaphawulile ngobuzwe bukaChidimma.
Lokhu kugcine kuphoqa abanye ukuba babhalele uMnyango wezaseKhaya ukuba uphenye kabanzi ngobuzwe bakhe. Izolo ngoLwesithathu, lo mnyango ukhiphe isitatimende esithi imiphumela yophenyo lwawo, olungakaphothulwa, iveze ukuthi kunomkhondo othi unina wale ntokazi wakhwabanisa umazisi waseNingizimu Afrika uChidimma esamncane.
