UMENGAMELI URAMAPHOSA UKHULEKELE ISILO UMISUZULU

335

UQEDE ukuqagula uMengameli Cyril Ramaphosa ebongela iSilo uMisuzulu njengenhloko entsha yesizwe samaZulu. INgonyama uMisuzulu ingene esihlalweni esivuleke emuva kokukhothama kwabazali bayo belandelana nyakenye, iSilo uZwelithini kaBhekuzulu obuze ngoNdasa (March) neNdlovukazi uMantfombi obeyiBamba Bukhosi ngoMbasa (April) 2021.


UMnu Ramaphosa wenze lesi simemezelo izolo ebusuku emuva kokuba ajuba uNgqongqoshe wezokuBusa ngokuBambisana nezoMdabu, uDkt Nkosazana Dlamini-Zuma noNdunankulu waKwaZulu-Natal uMnu Sihle Zikalala, ukuhlonza ngokumele athathe lobu bukhosi obesebuholwe nguMdlokombana iminyaka ecela kwewu-50 edlule. UMnu Ramaphosa uthe iSilo uMisuzulu sivunwa wumthetho ukuba kulesi sihlalo. Ufisele iSilo uMisuzulu ukubusa okuhle kweminyaka eminingi.


“Ukuthatha isihlalo sobukhosi kweSilo uMisuzulu kuwumzuzu omqoka kakhulu esizweni samaZulu. IMbube ithatha isihlalo sobukhosi obukhulu kakhulu, obalwa ngokuzinikela ukuze abantu baso bathole ubulungiswa. Ngifisa ukubungaza naso sonke isizwe sakuleli ukuphatha kweSilo uMisuzulu, ngimfisele konke okuhle kulesi sihlalo,” kusho uMnu Ramaphosa. NgoMgqibelo uNdunankulu kaZulu uMntwana uMangosuthu Buthelezi, utshele abebehambele umkhuleko wokukhumbula uMdlokombana neNdlovukazi uMantfombi KwaKhangela, ukuthi kunomlayezo omqoka awuthunywe nguMnu Ramaphosa eSilweni uMisuzulu. NangoLwesihlanu emcimbini wokukhumbula ukukhothama kweSilo uZwelithini obuse-Exhibition Centre, eThekwini, uMnu Zikalala wathi sebelinde uMnu Ramaphosa ukubeka isitembu ebuholini beSilo uMisu-zulu.

Previous articleZibondiwe emisakazweni yakuleli
Next articleKabeneme ‘kudayiswa izindawo zomphakathi’