NONHLAKANIPHO SHINGA
IYAQHUBEKA inkonzo yomngcwabo wamalungu awu 6, akwaKhambule, asocongwe ngesonto eledlule, njengoba isihlobo sesikhombisa sona sesingcwatshiwe. Kuzokhumbuleka ukuthi lo mndeni kushiye abaningi bekhathazekile ukubulawa kwawo, njengoba sivele siphezulu isibalo sokubulawa kwabantu eHlokozi. Inkonzo yomgcwabo isegcekeni kwaKhambule kanti amalungu omndeni asekhulumile athi, sekuyisikhathi sokubungaza impilo yabashonile yize noma izinhliziyo zabo zibhibha igazi.
Esigamekweni sangesonto eledlule kushone uBahlakaniphile Khambule (64), yindodakazi yakhe uNkz Philile Khambule (39), umakoti wakhona uNkk Nompilo Khambule (34) nezingane ezine uSkhumbuzo, uLisa, uSiphosethu noZemvelo. USkhumbuzo ungcwatshwe ngoLwesine.
