LINDA XIMBA
UNEMIBUZO engaphenduleki uBernard Parker (osesithombeni) ngoBongani “Ben 10” Zungu osanda kushiya iMamelodi Sundowns, owamephula umlenze. Lesi sigameko senzeka iDowns ibhekene neTS Galaxy kowe-last 16 yeCarling Knockout Cup eMbombela Stadium mhla ka-18 kuMfumfu (October) nyakenye.
UParker – owayengumdlali weTS Galaxy – uthi uBen 10 ubukeka engazimisele ngokuthi bahlangane emuva kwesigameko sokumephula esaba yindaba egudwini ngesizini edlule.
Ekhuluma ohlelweni lukaRobert Marawa kuleli sonto uParker, obefikele ukuyozethula njengomqeqeshi omusha weDStv Diski Challenge (DDC) kwiTS Galaxy, uthe yize uZungu wamthumelela umyalezo wokuxolisa kwi-Instagram, wamxolela, kodwa waxakwa wukuthi wabuye wakhombisa ukungafuni ukuba kuxhunyanwe, kuxoxwe ubuso nobuso njengabantu abasendimeni eyodwa kano-bhutshuzwayo futhi kabakaze baxabane phambilini.
“Ngokwami, bengifisa ukuthi uma sikhuluma aze angithinte lapho engalimala khona ukuze ngokomqondo ngithole ukwelapheka nesibusiso. Kodwa-ke senginqume ukumyeka ngoba kuyacaca ukuthi akafuni sihlale phansi siphuze itiye ndawonye,” esho.
Uveze ukuthi ngesikhathi esesibhedlela, iSundowns yamthumelela ikhadi elinomlayezo wokumfisela ukwelulama okusheshayo nezimbali, kodwa akakaze athole ucingo oluvela koyedwa wabaqeqeshi beSundowns.
Isigameko sokulimala kukaParker senza uRulani Mokwena – osanda kushiya iSundowns – nozakwabo weTS Galaxy, uSead Ramovic baphenduka izitha njengoba bebevamise ukujikijelana ngamazwi ezigcawini zabezindaba.
