Uqhubeke nokukhonya uGerda emabangeni amade

192
MZWAMANDLA ZONDI

UQHUBEKILE nokukhonya kwezokugijima kumabanga amade kuleli uGerda Steyn evikela ngempumelelo isicoco sakhe seTotalsports Two Oceans Marathon ephinda eqopha irekhodi kulo mjaho webanga lika-56km.

UGerda osubathela iPhantane Athletics Club uqophe isikhathi esiwu-3:26 ephula u:3:29 awenze nyakenye. Lo msubathi ubesenqoba lo mjaho okwesihlanu kulandelana.
Ingqwele esigabeni sabesilisa kube ngu-Onalenna Khonkobe ngesikhathi esiwu-3:09:30 elandelwa nguLloyd Bosman oqophe u-3:09:58 bobabili basubathela iNedbank Running Club.
Ingqwele yanyakenye uGivemore Mudzinganyama waseZimbabwe osubathela I-Ensika
ungene isithathu ngesikhathi esiwu-3:11:13.

UGerda uye kulo mjaho evele eyimfivilithi njengoba esanda kunqoba imijaho emibili emqoka ukuzilungiselela lo mjaho. Unqobe I-Om Die Dam waqopha irekhodi neVaal Marathon wenza irekhodi nakuyona.
Ekhuluma nabezindaba uthe:"Ngijabule kakhulu ngokunqoba lo mjaho, ngesikhathi ngiqala ukuhamba phambili bengingalibhekile irekhodi. Inhloso yami bekuwukunqoba. Ngithanda ukubonga kakhulu abantu abebengiseka emzileni kanye nomndeni wami, nekilabhu engingaphansi kwayo iPhantane."


NeKwaZulu-Natal kayisalanga ngaphandle kulo mjaho, uJenet Mbhele waseMzimkhulu osubathela iXcel oqophe umlando nyakenye engena unombolo 10 kwiComrades Marathon, ungene endaweni yesine ngesikhathi esiwu-3:41. Omunye umsubathi wesifundazwe owenze kahle uZinhle Shabalala waseMnambithi osubathela iHollywoodbets ungene unombolo 9 ngesikhathi esiwu-3:53. Bobabili bebeqala ukubamba iqhaza kulo mjaho.




Umjaho obhekiwe manje iComrades Marathon ezokuba mhla ka-9 kuNhlangulana (June) isukela eThekwini isongwe eMgungundlovu.
Izingqwele zalo mjaho zihlomule ngo-R2750 000 ngokuhlukana kobulili. Kusasa kuzokuba neHalf Marathon.
Isiyonke imiphumela yalo mjaho ihambe kanje, kwabesilisa:
1.Onalenna Khonkobe 3:09:30,
2.Lloyd Bosman 3:09:58,
3.Givemore Mudzinganyama 3:11:13,
4.Lebello Mopenyane 3:11:21,
5.Mpatso Nadolo 3:1135,
6.Lebenya Nkoka 3:12:33,
7.Degefa Lafebo 3:12:47,
8.Khoarahlane Seutloali 3:13:50,
9.Pule Sibeko 3:14:21,
10.Lyno Muchena 3:14:41.

Kwabesifazane: 1.Gerda Steyn 3:26:54,
2.Irvette van Zyl 3:29:30,
3.Loveness Madziva 3:38:00,
4.Jenet Mbhele 3:41:08,
5.Carla Natalia Molinaro 3:42:17,
6.Andrea Pomaranski 3:44:28,
7.Caitriona Jennings 3:46:47,
8.Adele Broodryk 3:47:50,
9.Zinhle Shabalala 3:53:39,
10.Steph Mccall 3:55:48

Previous articleUdilikajele kowashisa nemoto ikhansela leNFP lafa
Next articleUqhubeke nokukhonya uGerda emabangeni amade