MZWAMANDLA ZONDI
USIHLALO obambile weComrades Marathon Association (CMA) uJeff Minnaar uthembisa ukuthi umjaho wabo wangonyaka ozayo uzoqhubeka njengoba kuhleliwe, ubekhuluma nabezindaba namuhlanje ekuseni ngoMsombuluko.
Kuzokhumbuleka ukuthi izinto zimapeketwana kule nhlangano nokuholele ekutheni usihlalo wayo, uMqondisi Ngcobo asule esikhundleni nesekela lakhe uLeslie Burnard nabanye ababili. Bekhala ngokuhlukumezeka abakutholayo ngezinkulumo ezibhalwa ngabathile ezinkundleni zokuxhumana, kugxekwa amalungu athile ngenkohlakalo, nokungabi khona kozinzo ngaphakathi kwiCMA.
UMinaar uthembisa ukuthi bazobhekana nalabo abafaka le nhlangano ehlazweni nabathatha izindaba zangaphakathi bazinekele izwe okusolwa amanye amalunga ebhodi. Uthi abakuzele ukubuyisa uzinzo kwiCMA athi unethemba lokuthi kuzoshaya usuku lwe-AGM ngoLwezi (November) isimo sibe sesibuyele esimweni saso. Uthi bake babhekana nesikhathi esifuze lesi phambilini sadlula, nalesi sizodlula.
