LIBASHONELE ilanga abalisa abane okuthiwa bebethathwa ngokuthi bayingozi, ngesikhathi bethelwa othulini ngamaphoyisa izolo, ngoLwesibili, ebusuku.
Okhulumela amaphoyisa KwaZulu-Natal, uColonel Robert Netshiunda, uthi amaphoyisa athole umkhondo wokuthi laba balisa bazulazula ngemoto ngakwenye inxanxathela yezitolo eMlazi.
Uthi ngesikhathi amaphoyisa elandela imoto, ebebehamba ngayo, bawadubulile, nawo aphindisela. Uthi imoto lena amaphoyisa ayilandele baze befika emgwaqeni onguthelawayeka, baqala badubula babhekisa kuwona amaphoyisa.
Ngokwemibiko, kalikho iphoyisa elilimele noma elibulelwe. Laba balisa kuthiwa bebefunelwa amacala amathathu okubulala enzeka eNanda ngoNdasa (March) nangoMbasa (April).
Kwesinye isigameko, amaphoyisa afuna abantu abathathu abaphuma babaleka emotweni kuMthiyane Avenue eLamontville. Imoto abebehamba ngayo ngeSonto, yamiswa ngamaphoyisa eyisola. Le moto amaphoyisa athi uma eyipequlula, athola ukuthi inezimpahla zokugqoka ezintsha eziningi ezazintshontshiwe.
menzi.jele@ilanganews.co.za
