IMeya yaseKing Cetshwayo, uMnu Skhumbuzo Dlamini, inxuse izakhamizi ukuba zibuyele emuva kusadliwa ngoludala, lapho khona abantu babengalindi ukukhangezwa, kodwa babe-sebenzisa lokho abanakho ukuze baziphilise.
UDlamini ubethula inkulumo yosuku emcimbini wokwethulwa kohlahlomali luka-2025/26 obubanjelwe enkundleni yezemidlalo iDonda, eNtambanana, eMpangeni, ngaphansi kukaMasipala uMfolozi, oyingane yowesiFunda iKing Cetshwayo. Umasipala waseMfolozi uholwa nguMnu Xolani Bhengu ngethikithi le-IFP.
Ethula inkulumo yakhe uDlamini, ukhuthaze abantu besilisa ukuba basike iphethini kwabesifazane, bakhuthalele ukufaka izicelo zoxhaso lukahulumeni. Kulo mcimbi kumenyezelwe iningi labesifazane abahlomule ngezinsizakusebenza emabhizinisini abo asafufusa.
“Namuhla sizokwethula izinsiza kusebenza ebantwini besifazane abaziphilisa ngokwenza imisebenzi eyahlukene emakhaya nasemiphakathini abahlala kuyona. Nginxusa namadoda ukuba asukume, afake izicelo ngoba akulula ukuthi abaphethe usizo beze ebantwini, kodwa ngabadinga usizo okufanele baqale indaba.
“Isifiso sami esikhulu ngesokuba kubuyelwe ezikhathini ezedlule lapho khona abantu babekwazi ukuzakhela umnotho ngalokho abanakho emakhaya abo. Kuningi esikubeke eqhulwini okufanele sikwenzele umphakathi esiwuholayo. Udaba lwamanzi nokuhanjiswa kwezidingo zomphakathi, yikhona esikubeke phambili ngoba sinenkolelo yokuthi abantu kufanele bahlinzekwe ngezidingo,” kuchaza uDlamini.
UBhengu ukhale ngokwanda kwezibalo zabantu abadlula emhlabeni ngenxa yodlame lwezobulili. Uthe lena yimpi okufanele wonke umuntu abhekane nayo.
“Eminyakeni eyedlule uMntwana waKwaPhindangene, iNkosi uMangosuthu Buthelezi, wasixwayisa ngenkinga engase idaleke ngenxa yodlame lokuhlukumezana kwabantu egameni lothando. Ngaleyo minyaka sasisayibukela kude le nkinga, namuhla sibhekene nayo lapha ezindaweni zasemakhaya. Ngiyafisa ukuba ngikusho ukuthi umkhandlu waseMfolozi uyaqhubeka nokufaka ingqalasizinda ezindaweni ezahlukene okubalwa kuyona nokuvulwa kwemigwaqo engenela emakhaya,” kuphetha uBhengu.
