IDOLOBHA laKwaZulu-Natal iVryheid lizosingatha iFortress Running Series okuyimijaho ehlelwe yizingwazi zabasubathi ukuvundulula ithalente. Kuzokube kugaduliswana kwi-21km, i-10km ne-5km.
IFortress yakamuva ibibanjelwe eVenda Plaza. Kuzokuba ngeyokuqala ibanjelwa eKZN njengoba izokuba ngoMgqibelo eBaqulusi Plaza (okuyindawo yeFortress Real Estate). Umjaho olandelayo uzokuba se-Evaton Mall, eGauteng, bese kuvalwa ngowaseSterkspruit Plaza e-Eastern Cape ngomhla ka-4 ku-October.
IFortress Running Series ihlele imijaho yawo ezindaweni ezahlukene isebenzisana ne-ISMO Athletics Club ephethwe yingwazi u-Israel Morake owangena unombolo 4 ngo-1991 kwiComrades Marathon, kwathi ngo-1992 wanqoba iTwo Oceans Marathon. Ezinye izingwazi eziyingxenye yalo mjaho nguHezekiel Sepeng ongumsubathi wokuqala ompisholo ukuhlomula ngendondo kuma-Olympic Games ka-1996 aye-Atlanta, ebuya nesiliva kwi-800m noDorah Mngwevu ongumphathi wezokugijima oseke wahlonishwa ngendondo yeMomentum Awards.
UMorake uthe ujabule kakhulu ngokuba yingxenye yeFortress Running Series. Uthi kunzima ukuphumelela kulo mdlalo ngaphandle kosizo.
“Ukuvundulula ithalente ezindaweni zasemakhaya kusemithanjeni yethu. INingizimu Afrika inethalente eliyisimanga. Yingakho uhlelo lwethu lugxila ezindaweni zasemakhaya kwazise izinto eziningi zenzeka amadolobheni amakhulu. Nami ukuze ngifike lapho ngikhona kunabantu abangisiza. Kusezandleni zethu ukuba sifake lo mdlalo kwintsha. IFortress Running Series izovala igebe phakathi kwabantwana basemadolobheni nabasemakhaya,” kusho uMorake.
EVryheid i-ISMO izokuba isebenzisana neNkamana AC yaseVryheid.
Usihlalo weNkamana uThami Sukazi uthe bajabule kakhulu ngokuthola ithuba lokusebenzisana neFortress ne-ISMO. Uthi bangajabula uma bengathola abasubathi abawu-500 noma abawu-1000 kulo mjaho. Uthi abagijimi abaneminyaka ew-12 babhalisa mahala. Uthi lokhu kuyizindaba ezinhle okuthuthukiseni amakhono.
Izingqwele ze-21km zizohlomula ngo-R3000 kwehle kuze kufike kwabazongena endaweni yesihlanu abazogoduka no-R500 ngokuhlukana kobulili kube u-R1000 kwabazonqoba kwi-10km. Abafuna ukubhalisa bangangena kule-link: haps://secure.onreg.com/onreg2/front/step1.php?id=7798&occurrence=2026-07-25.
