KALIKHO iqembu elizowina udede, liphathe lodwa kuMasipala weTheku okhethweni lohulumeni basekhaya oluzoba ngomhla ka-4 kuLwezi (November). Lokhu kuvezwe wucwaningo oluqhutshwa yiMark Data Poll, olucwaninga ngemiphumela yalolu khetho komasipala abahlukene.
Ucwaningo luveza ukuthi nakuba amaqembu iDA neMK Party, kuyiwona abukeka enezinombolo eziphezulu ngamaphesenti, kodwa kusobala ukuthi kuwona womabili la maqembu, kalikho elingaphezulu kwengxenye, okungenza libuse lo masipala omkhulu KwaZulu-Natal, ngaphandle kokubambisana namanye.
UMasipala weTheku yiwona ogabe ngamaqembu amaningi alabo abakhankasele ukuwuphatha. Abalelwa ku-69 amaqembu agaqele izihlalo kulo masipala, nabazimele abawu-14. Kulo masipala babalelwa ku-2 032 565 ababhalisele ukuvota kulolu khetho lohulumeni basekhaya oluzayo.
Phambilini ucwaningo olwenziwe yiSocial Research Foundation, lwaveza ukuthi iMK Party iqengqeleza phambili ngo-44%, kanti muva nje leli qembu selehlile, lafinyelela ku-33%. Ngakolunye uhlangothi, iDA ikhombise ukunyuka isuka ku-23%, muva nje isifinyelele ku-28%. I-ANC obekuyiqembu ebelihlale liwina kulo masipala, liyaqhubeka nokwehla kwazise ucwaningo luyibeka ku-18%.
Uma lezi zinombolo ziqhubeka ngale ndlela, kusho ukuthi iya ngokuqina eyokuthi lo masipala uzobuswa ngokuhlanganyela kwamaqembu ngemuva kwalolu khetho. Amaqembu amakhulu kulo masipala amatasa, akhankasela ukuthola amavoti. La maqembu okuyi-MK Party, yiDA, yi-EFF, yi-ActionSA ne-IFP, asebamemezele abazoba yizimeya uma enqoba ukhetho kulo masipala.
Ngakolunye uhlangothi, i-ANC kusalindeleke ukuthi imemezele ozokuba yimeya uma inqoba lolu khetho.
