KUNXUSWA abantu ukuqikelela ukuphephepha kwabo nokushayela ngokuphelela emigwaqweni njengoba isimo sezulu sisibi ezingxenyeni ezehlukene zezwe, ngenxa yomsinga obandayo.
UMnyango wezokuThutha nokuhlaliswa kwaBantu KwaZulu-Natal usumemezele ukuthi uvaliwe umgwaqo uN2 phakathi kwePortShepstone neKokstad, ngenxa yokukhithika. UNgqongqoshe walo mnyango uMnu Siboniso Duma uthe omunye umgwaqo ovaliwe ngophakathi kweKokstad noMgungundlovu.
Unxuse abantu ukugwema ukusebenzisa le migwaqo.
Umnyango uthi kwezinye izindawo kubhilite umoya omkhulu nezimvula ezinamandla ezingadala izikhukhula namagagasi ayingozi olwandle. Ezinye izindawo ezigubuzelwe yiqhwa ngezimaphakathi neKZN, nezingxenye ezithile ze-Eastern Cape, iNorthern Cape neFree State.
ISouth African Weather Service ikhiphe isexwayiso esikuLevel 4 somoya onamandla ezindaweni ezisogwini oluseNingizimu yeKZN. Kulindeleke ukuba ezindaweni eziningi isimo sezulu siqale ukuba ngcono ngoLwesine.
