ISILILO kudlula emhlabeni uWonderboy Mntambo obedume ngesibongo sakwaMtshali esagijima kuMaZulu FC ngeminyaka yo-90.
UMntambo udlule emhlabeni ngoLwesibili ekuseni esibhedlela eMount Edcombe emva kokuxinwa wukugula isikhashana.
Le nkakha idlula emhlabeni nje ibinesikhungo eNtuzuma lapho beyihlwaya khona ikhono kubadlali bebhola abasebencane.
Usuke kuMaZulu FC wayogijima kwiTongaat Crusaders nokuyilapho ebeke khona amakhokho akhe ethala. Ngemuva kokubeka amakhokho ethala ube eseqeqesha iqembu iDanefield FC kaJessie Dhamarlingum ebidlala kwiSecond Division (Safa KZN ABC Motsepe League).
Ubesaqhubeka nokuba yingxenye yebhola kwazise ubebuye abe sohlelweni lakwaBuild-it esebenzisana noBoyzie Mngoma osebenze isikhathi kuMaZulu FC bakhiqiza uMduduzi Nxele ongasekho.
Sekuwumlando ukuthi uMntambo ubenesitifiketi sika-Level 2 nofana ncamashi noCaf B Licence.
Le nkakha ibisinomuzi izinze eNtuzuma.
Amalungiselelo okufihlwa kwakhe asazomenyezelwa ngokuqhubeka kwesonto.
