SEBEQALILE omasipala ukukhetha izikwati zabo ezizokuba yingxenye yamaSalga Games azokuba ngoZibandlela (December) eMgungundlovu. Kulo mqhudelwano kusuke kuqhudelwana emidlalweni eminingi eyahlukene.
Ngempelasonto zizokube zikhiphana inkani kuMasipala waseNkandla ngoMgqibelo kusuka ngo-8 ekuseni eNkandla Stadium ukulungiselela amaSalga. Kuzogaduliswana ebholeni lezinyawo abesilisa nabesifazane, ebholeni lo mqakiswano, ama-Indigenous Games (Board Games), ezamankomane neChess.
UThami Ngubane owengamele ezemidlalo kulo masipala oholwa yemeya uNonhlanhla Nzuza uthe sebemi ngomumo ukusingatha lo mqhudelwano wokuvundulula ithalente entsheni. Uthi bameme Amazulu FC, iRichards Bay ukuzokwehlonza ikhono.
Nemeya ymuNonhlanhla Nzuza uthe sebemi ngomumo ukusingatha lo mqhudelwano oyisango lokuya kumaSalga Games.
“Silindele izinga eliphezulu kulo mqhudelwano lapho intsha izokube izoveza ithalente layo. Simeme amakilabhu aKwaZulu-Natal adlala kwiBetway Premiership okungamaZulu, iRichards Bay namanye. Omunye othembisile ukuthi uzokube ekhona nguXolani Khumalo woMkhambathi, kube nguSanele Cele ophuma eGoli osebenzisana noDukuduku Makhanya obeqeqesha IDDC ye-Orlando Pirates ngesizini edlule,” kusho imeya.
Iqhube yathi lo mqhudelwano uqale emawadini, kuhlungwa. Ithi abenze kahle bazothola ithuba lokumela iNkandla kwiKing Cetshwayo Mayarol Cup, bese bedlulela kumaSalga Games.
“Simeme abaholi abaningi ukuba babe yingxenye yalo mqhudelwano. Nginethemba lokuthi uNdunankulu uThami Ntuli ophuma khona lapha eNkandla uzokube ekhona. Ngimema wonke umphakathi nabazali ukuba bafike ukuzokhomoza izingane zabo.”
Imidlalo yamaSalsga iqale eminyakeni eminingi eyedlule kanti seyikhiqize abadlali abaningi abahlonishwayo kuleli.
