KULAMULE amaphoyisa kaMasipala weTheku naweSAPS ukuhlakaza isixakaxaka kubhekene ngeziqu zamehlo abakuleli nabakwamanye amazwe ngaphandle kwesibhedlela i-Addington, eThekwini.
Ababhikishi abayingxene yenhlangano iMarch in March bagasele kulesi sibhedlela namuhla ngoLwesine, bemasha, bavimba abantu abakuleli ngokungemthetho ukungena kulesi ibhedlela njengoba bethi sikhokhelwa ngemali yabakhokhintela.
Abe March in March bathi uhulumeni ubhekene nenkinga yemali, ngakho bazowusabalalisa lo mkhankaso ukuze izinsiza ezikhona ezincane zisize izakhamizi zakuleli nabo bonke abahlonipha umthetho wakuleli.
Sekuyophela isonto kwenzeka okufanayo emtholampilo waseRosettenville, eGoli, lapho ababhikishi bejikisa abokufika.
UNkk Lerato Ngobeni, we-Action SA, uthi isimo sisazoqhubeka nokuba sibi uma uhulumeni ungayisukumeli indaba yabantu abakuleli ngokungemthetho.
Ugxeke iHuman Rights Commission, nezinye izinhlangano ezilwela malungelo abantu, ngokusebenzisa umthethosisekelo wakuleli ukweseka izigilamkhuba. Uthe ukuba kwelinye izwe ngokungemvume kuyicala, ngakho owenza lokho akadingi ukuvikelwa wumthetho wakulelo lizwe ngoba akawuhloniphi.
