IKHOMISHINI yamalungelo abantu, iSA Human Rights Commission (SAHRC), eWestern Cape isiqale uphenyo ngezinsolo zokucwasa ngokobuhlanga esigamekweni esenzeke endizeni yakwaFlySafair ngenyanga edlule.
Lesi sigameko esasusa ukukhuluma nasezinkundleni zokuxhumana sibandakanya isisebenzi seSABC uNobuntu Mkhize, lapho ayesusana nezisebenzi zasendizeni, waze wakhuluma inkulumo ‘elumelayo’ ngamaKhaladi.
Lokhu kuza ngemuva kokuba iqembu iPatriotic Alliance lifake isikhalazo kwiSAHRC. Khonamanjalo neDA ivulele uNobuntu icala lokudicilela phansi isithunzi nelokushaya.
Ngokombiko weTimes Live, inhloso yeSAHRC yokungenelela wukulwa nokucwasana kwabantu.
“I-SAHRC ikhathazekile ngokuqhubeka kwezigameko zokucwasana ngokobuhlanga, ikakhulu njengoba izwe libungaza iminyaka ewu-30 yenkululeko.
“Siyazigxeka kakhulu izigameko zokucwasana futhi siyaqonda ukuthi kakulula ukubhekana nezigameko zalolu hlobo,” kusho le khomishini esitatimendeni.
