LIJIKELE entathelini ebeyiliyithwebula seliyongena esitokisini, layibuza ukuthi ifuna ukushela yini njengoba ilishutha, iphoyisa lesifazane eligixabezwe ngodilikajele nezinkabi zalo ezine, ngecala lokubulala.
UDumisile Sibisi (37), obeyiphoyisa eNkandla, ugwetshwe udilikajele yiNkantolo eNkulu yaseMthunzini, ngoLwesine. Ubebhekene namacala ayisithupha okubalwa kuwo elokubulala uninakhulu womyeni wakhe, uNkk Dingeni Kubheka, nelokuzama ukubulala umyeni obemlobola, uMnu Kwanda Mngomezulu, esigamekweni esenzeka ngo-2022.
Kulawa macala uDumisile uboshwe nezinkabi ezine okunguThulani Mbatha (38), uMaqhude Mavuso (30), uMndeni Buthelezi (33) ongumelaphi wendabuko, okungabaseVryheid, noDumsani Gumede (44) waseGoli nabo abagwetshwe isigwebo esifanayo.
Ngokobufakazi obethulwe enkantolo, kuvele ukuthi la macala enzeka ngoLwezi (November) ngo-2022, esigodini saseCayini, KwaNongoma. Kuthiwa uDumisile nguyena obengubhongoza, ngoba exakwe yisikhwele sokuthi umyeni usethatha enye ingoduso.
Ngokwamaphepha abephambi kwenkantolo, kuthiwa inhloso kwakuwukubulala umyeni noninakhulu (uNkk Kubheka), kodwa izinkabi zafica uninakhulu ehleli yedwa, zabulala yena. Okuqaphelekile kuDumisile wukuthi ngesikhathi begwetshwa, ubebukeka engazi nanyaka.
Ngesikhathi ijaji likhipha isigwebo, uDumisile ubonakale engakugqizi qakala obekwenzeka enkantolo. Kunalokho ubize amalungu omndeni wakhe ethi mawasondele, kukhona afuna ukuwaxoxela khona abesekukhohliwe. Ngesikhathi esefaswa ngozankosi, uvalelise kubo bonke abebesenkantolo, wathi uyobabona uma esebabona ngaleso sikhathi, impilo imfushane.
Eseyongena esitokisini, ummeli wakhe ukhale ngentatheli ebeyimshutha, okuyilapho uDumisile ephendukele kuyo wathi, ayimeshele. ILANGA likhulume nomyeni kaDumisile ngemuva kwesigwebo, othe ugculisekile ngesinqumo senkantolo.
“Sijabule kakhulu ngesinqumo esiphume enkantolo. Nginethemba lokuthi isigwebo abasitholile sizothumela umyalezo nakwabanye abasafisa ukwenza amacala afuze lawo. UDumisile ubeyingoduso yami, sengizishaye zonke izinkomo, sekusele isigcawu kuphela.
“Into esixabanisile naye wukuzibandakanya kwakhe nabantu ababeyotapa ezitolo. Lokho kwangicasula ukuthi angayenza kanjani into enjalo ebe eyiphoyisa elafunga ukuthi lizoziphatha kahle, kodwa aphinde enze into enje. Kusuka lapho, akubange kusaba kuhle phakathi kwethu, kuze kwaze kwaba ukuthi uthatha imithwalo yakhe, ubuyela kubo,” esho.
Uthi ngemuva kokuba esebuyele kubo uDumisile, wabe eseqala izinhlelo zokuthi alobole enye inkosikazi, okuyikhona okwamcasula kakhulu, wathatha isinqumo sokuthi ahlele itulo lokumbulala noninakhulu.
hlongwaj@ilenganews.co.za
