AKAGCULISEKANGA ngakubone eqenjini lakhe umqeqeshi we-Orlando Pirates u-Abdeslam Ouaddou. IBucs iguqise ngo-2-1 esikhathini esengeziwe iDurban City kwi-quarter final yeMTN8 ngoMgqibelo ntambama e-Orlando Amstel Arena, eSoweto.
IBucs iyona evule inkundla uPatrick Maswanganyi evalela iphenathi, kwathi elesibili lashaywa nguGhampani Lungu. EleCity lokubika ekhaya lishaywe nguJean Lwamba. UBrooklyn Poggenpoel weCity akawuqedanga lo mdlalo ekhishwa ngekhadi elibomvu ngomzuzu ka-35.
U-Ouaddou uthi ezakhe zidlale ibhola elincane kakhulu kulo mdlalo.
“Besazi ukuthi lo mdlalo ngeke ube lula ngoba iDurban City idlala kahle. Sibhekene nenkinga ngale sizini, wonke umuntu ufuna ukwehlula thina. Kodwa-ke ngijabule ngoba sigcine sinqobile ngoba ekugcineni sifuna ukuqhubeka nokuvikela isicoco sethu.
Kufanele ngikusho kodwa ukuthi asidlalanga kahle kulo mdlalo, sishaye into ephansi kakhulu kodwa siyabonga ngoba sigcine sinqobile,” kusho u-Ouaddou.
