UBONGA uNkulunkulu ngokwenzeka empilweni yakhe uKamogelo Sebelebele, ongumdlali we-Orlando Pirates ogila izimanga kule kilabhu ekubeni esanda kufika kuyona.
IBucs ingene okwesine amasizini elandelana kowamanqamu weMTN8, iguqisa iMamelodi Sundowns ngo-4-1 wamaphenathi emlenzeni wesibili we-semi final yalo mqhudelwano obungoMgqibelo eLucas Moripe Stadium, e-Atteridgeville. Umdlalo ubuphele ziba-mbene ngo-1-1.
Igoli leDowns lishaywe ngu-Iqraam Rayners ngomzuzu ka-17, labulawa ngelikaSebelebele ngo-ka-73. Kube ngu-2-2 sekuhlanganiswe yomibili imilenze.
USebelebele uyazishibilikela enkundleni selokhu ejoyine iBucs ekuqaleni kwale sizini, esuka kwiTS Galaxy. Nguyena futhi oyishayele igoli lokukhava nasemlenzeni wokuqala, nawo ophele ngo-1-1 ngeledlule e-Orlando Stadium, eSoweto.
USebelebele – oqokwe njengomdlali ovelele kulo mdlalo – lonke udumo ulubhekise kuNkulunkulu ngokwenzeka empilweni yakhe, selokhu efike kwiBucs.
“Ngibonga nomqeqeshi ngethuba anginika lona. Umdlalo siwuqale ngezinga eliphansi, kodwa ngesiwombe sesibili salikhuphula igiya ngoba besazi ukuthi bazokhathala.
“Ngibonga uNkulunkulu ngoba uphinde wangipha igoli, futhi sakwazi ukunqoba, sadlulela kowamanqamu,” esho.
IBucs izodlala owamanqamu walo mqhudelwano neStellenbosch FC, ehlule iSekhukhune United ngo-3-1 sekuhlanganiswe yomibili imilenze. Iya kowamanqamu nje iBucs, isiyinqobe kathathu kulandelana iMTN8 emidlalweni (yomithathu) ebeyigijinyelwa eMoses Mabhida Stadium, eThekwini.
ITheku lithishwa ngokuphinda ligixabezwe ngowamanqamu ozokuba ngoMgqibelo womhla ka-13 kuMandulo (September). Kuthiwa leli dolobha limiswe kabi yiFree State, nayo efuna lo mdlalo uyogijinyelwa eBloemfontein.
Sekuwumlando ukuthi iBucs iguqise iStellies ngo-3-1 kowamanqamu wangesizini edlule, khona eMoses Mabhida.
