IYASHISA insimbi kuJose Riveiro eGibhithe njengoba kuvela ezithi i-Al Ahly inkankanya ukumkhomba indlela kungakapheli sikhathi singakanani efikile kule kilabhu ayijoyine esuka kwi-Orlando Pirates.
Ngokwemithombo yezindaba yakuleliya lizwe, izinyawo zingagcwala udaka noma yinini kuRiveiro ngemuva kokunqoba umdlalo owodwa kwemithathu yokuvula isizini. Lo mqeqeshi odabuka eSpain ubengakadliwa njengoba edlale ngokulingana kule eminye emibili.
Ingcindezi inkulu kakhulu kuRiveiro njengoba umdlalo wezakhe olandelayo bezowudlala ngoMgqibelo Cairo International Stadium, nePyramids FC, engophetha ngeCaf Champions League.
Selokhu efikile eGibhithe uRiveiro uthola ukugxekwa njengoba izinkakha ze-Al Ahly zikhala ngendlela adlala ngayo nokuthi uyehluleka ukuhlanganisa abadlali, yize enokhilimu wabadlali.
Kuthiwa umfica umdlalo wangoMgqibelo uRiveiro, umphumela wawo yiwona ongase ucacise ngekusasa lakhe kule kilabhu enkulukazi e-Afrika.
