IZOTHWALA kanzima i-MK Party ukuthola uNobhala Jikelele onamava afana nakaMnu Floyd Shivambu kwezepolitiki.
Lokhu kuvezwe umhlaziyi wezepolitiki ozimele uSolwazi Bheki Mngomezulu kulandela isinqumo saleli qembu sokuhoxisa uShivambu esikhundleni sokuba nguNobhala Jikelele walo ngoLwesibili.
Leli qembu limemezele ukuthi liyamhoxisa uShivambu kulesi sikhundla kulandela ukwenza okuphambene nomthethosisekelo walo ngokuvakashela ibandla likaMbhishobhi Shepherd Bushiri eMalawi ngempelasonto yePhasika nonyaka.
UShivambu wathola okukhulu ukugxekwa ngokuhambela ibandla lalo mbhishobhi obhekene namacala abucayi eNingizimu Afrika.
I-MK Party yakhipha isitatimende iziqhelelanisa nalolu hambo kanti uShivambu usanda kucashunwa emithonjeni yabezindaba elibeka ngembaba elokuthi akasoze akuxolisela ukuhambela ibandla likaBushiri.
Leli qembu lihoxise uShivambu kulesi sikhundla labe seliqoka ukumjuba ePhalamende likazwelonke njengelungu lalo.
Ehlaziya isinqumo saleli qembu uMngomezulu uthe nakuba kube yisinqumo esikhombisa ukuthi i-MK Party iyawulandela umthethosisekelo walo kodwa sikhombise ukugagamela.
“Bekuzoba ngcono ukuba bamnxuse ukuba abhale incwadi yesixoliso kunokuba bamkhiphe nje ngokugcwele ekubeni uNobhala Jikelele,” kusho uMngomezulu.
Uqhube ngokuthi selokhu angena uShivambu kulesi sikhundla uzamile ukwakha uzinzo kuleli qembu kanti namagalelo akhe ekuhlanganiseni umthethosisekelo waleli qembu abonakalile.
“Ngakho ukususa umuntu onamava nesipiliyoni esifana nesakhe kwezepolitiki kufana nokumba umgodi omkhulu,” kusho uMngomezulu.
Uthe lesi sinqumo sizoba nomthelela onzima eqenjini njengoba kuzobanzima ukuthi lithole omunye uNobhala Jikelele ogabe ngamava nesipiliyoni esifana nesikaShivambu.
UMngomezulu ukubeke kwacaca ukuthi leli qembu lizothwala kanzima ukuthola uNobhala Jikelele ozogcwalisa isikhala esivuleke ngoShivambu.
UShivambu umenyezelwe ngoLwezi nyakenye kulesi sikhundla kulandela ukwesula kukaDkt Sifiso Maseko kulesi sikhundla.
UMngomezulu uthe nakuba ukususwa kulesi sikhundla kusho ukwehlelwa ngamandla kuShivambu kodwa usengawenza umehluko ePhalamende lapho ejutshwa khona ngenxa yaso isipiliyoni sakhe.
Uthe njengoba eyoba yilungu kusho ukuthi uzokwazi ukusiza iqembu liqhamuke namaphuzu aqinile uma kudingidwa izihloko ezimqoka nezithinta umthethosisekelo wezwe.
“Nakhona ekubeni ilungu usengakwazi ukukhula athole izikhundla ePhalamende,” kusho uMngomezulu.
