IKHIPHE isidumbu impi yabafundi baKwaNomathiya Technical High School, KwaSomkhele, eMtubatuba ngoLwesithathu ntambama. Ngokuthola kwaleli phephandaba, kuthiwa kunombango wezigodi omdala, kodwa okukhiphe isidumbu, kungenxa yentombazane ebibangwa.
Kubikwa ukuthi umufi uNqubeko Buthelezi obefunda uGrade 11, ubekade engesiyona ingxenye yabalwayo kodwa ubezwana nabasembangweni wentombi. Kuthiwa impi iqale esikoleni, bayilamula othisha, kuthe uma ukuphuma isikole, yasuka okuyilapho egwazelwe khona uNqubeko ngaphandle kwesikole washonela khona lapho. Umthombo weLANGA Lempelasonto, uthi ukulwa kwabafundi ngokwezigodi kujawayelekile, kodwa okwenzeke ngoLwesithathu kuwushaqisile umphakathini.
“Umfundi ogwaziwe ubengesiyona ingxenye yempi, kusolakala ukuthi kulaba ebebelwa, kukhona abuye ahambe nabo-okungenzeka ukuthi bebekhiphela kuyena ukucasuka kwabo. Umfundi ufele khona lapho ngaso leso sikhathi,” kusho umthombo.
kuthiwa umfundi obangwayo ufunda kusona lesi sikole. Ngokusho kwabantu ababonile kwenzeka lesi sigameko, kuthiwa lona obeshawa akabuyiselanga wabe esethinta asondelene nabo. Kuthiwa lesi sigameko senzeke eduzane nesikole.
“Le mpi ibisihlanganisa nabantu okungesibona abafundi, kodwa ukulwa kwabo bekuthinta abafunda ngaphakathi. Ngesikhathi bevimbana, abanye babelekile. Lona oshonile akabalekanga, bamgwaze washonela khona lapho. Othisha bafike selidume ledlula, isilele phansi ingane ingasekho emhlabeni. Sidumele iyathusa le nto eyenziwa izingane,” esho.
Imizamo yokuthola isigungu sabazali bakulesi sikole ayiphumelelanga.
Okhulumela uMnyango wezeMfundo KwaZulu-Natal uMnu Muzi Mahlambi uthi badlulisa amazwi enduduzo emndenini , kothisha nakubafundi.
“Umnyango wezeMfundo udlulisa ukudabuka kakhulu ngokwenzekile,” esho. Amaphoyisa KwaZulu-Natal athunyelelwe imibuzo ngalesi sigameko nakuba kushaye isikhathi sokushicilela engakasiqinisekisi isigameko.
mthobisis@ilanganews.co.za
