USALOKHU eqhubekile nokucela usizo owesifazane wakuleli obhajwe phesheya kwezilwandle, e-United Arab Emirates (UAE), uBongile Ntombela, ngemuva kokuphelelwa wumsebenzi, kanti usenesikweletu.
Le ntokazi incenga ize ikhihle isililo kunanoma ngubani ongakwazi ukuyiboneleka imali engango-R125 000, ukuze ikhokhe isikweletu enaso kwelinye lamabhange akuleliya lizwe, ukuze bayidedele. Ngokusho kwakhe kuTik-Tok, uBongile ubesenza e-UAE, kwaba nokungaboni ngaso linye phakathi kwakhe nomqashi, wabe esephoqwa ukuba esule emsebenzini.
“Kangifunanga ukwesula, base bengixosha kanti bengisanda kuthatha isikweletu. Ngenhlanhla izingane bese ngizihambisile, manje siyangiphelela isikhathi sokuhlala kuleli lizwe, kodwa kanginayo imali okumele ngiyikhokhele leli bhange ngaphambi kokuba bangidedele.
“Ngiyacela kunoma ngabe ngubani ongangelekelela, sizokwenza izinhlelo zokuthi le mali ngizoyikhokha kanjani,” kusho yena.
Uthe usewutholile umsebenzi eNingizimu Afrika kodwa akakwazi ukuzoqala kuwona engasikhokhile lesi sikweletu. Uthe usezamile nokukhala kuhulumeni wakuleli kodwa ubengakalutholi usizo.
Useqale nesikhwama sokucela umnikelo, iBack-A-Budy.
